Session-ah hnawk min tih avangin MLA aṭangin min paih - Lalduhoma

ZPM leader Lalduhoma chuan nimina ZPM Thenzawl Block-in Vantawng Group YMA Rún, Thenzawla political training an buatsaih a hmanpuinaah thu sawiin, Assembly session-ah hnawk titu an awm avanga MLA aṭang paih a nih thu a sawi.

Lalduhoma chuan, MP aṭanga bàn a nih chhan chu, dan a bawhchhiat vang tih a phat loh thu sawiin, "Mizoram tan central minister nih theihna kalsanin, ram leh hnam tan MP a nihna ka hlan. MLA aṭanga bàn ka nih chhan erawh dan bawhchhiat vang ni loin, session-a ka awm ve hnawk min tih êm avangin min paih a ni,"  a ti.

ZPM candidate leh ZPM MLA nia ngaih vek an nih thu sawiin Lalduhoma chuan, "Nimin thleng pawhin Chief Minister pawhin ZPM kan nihzia a sawi a sawi a, dan hi ka bawhchhe lo reng reng," a ti a; mimala politics-a inîtsîkna vang liau liaua bàn a ni tih mipuiin an hriat thu a sawi.

Serchhip biala Assem­bly by-election-a ZPM candidate tur Lalduhoma chuan, MLA leh AMC inthlanah ZPM chu pahnihna an nih thu sawiin, "Congress pathumna an ni a, MNF nen final kan khel dawn. Mizoram politics-ah sorkar lai chu a dawttu zelin an thlâk ṭhin," a ti.

ZPM Leader chuan, pathumna leh palina an nih laiin sorkar lai thlak an lo tum tawh tih sawiin, "Kan hlawhchham a ni. Inthlan lo awm leh turah chuan ZPM-ah mipuite'n beiseina sang tak an nei a, tun dinhmunah Zoram mipuiin sorkarna siam ve turin min beisei a ni," a ti a; Serchhip biala by-election neih tur chuan Mizoram politics thui tak a nghawng tur thu a sawi.