April 14-20 ah Fire Service Week

Kumina kângmei laka fimkhurna inzirtirna hun, Fire Service Week chu April 14-20 inkarah neih a ni dawn a, thupui chu, 'Kângmei chhuah thulhah kâng ṭhelhna hmanrua nena lo inrálrin lâwk hi kan himna a ni,' tih a ni ang.

Sorkar laipuia Ministry of Home Affairs-in Fire Service Week hman dan tur a ruahmante chu nimin khan Social Welfare & Tribal Affairs secretary Sangchhin Chinzah hoin CS Conference Hall-ah thlirho a ni. Fire & Emergency Service (FES) director C Lalthanmawia'n FES-in  Fire Service Week hman dan tur a ruahman dan a sawifiah a, FES rawt angin department hrang hrangte chu mawh­phurhna pek a ni.

Sorkar thuchhuah tarlan danin, kângmei laka himna inzirtirna hapta hi sorkar laipui duh dan chuan April thla laihâwlah hman tur a ni a, mahse, Mizoramah chuan March thla tìr aṭangin khua a ro tawh avangin Fire Service Week hman dan tur rêla nimina ṭhukhawm chuan, March thla tìr aṭangin kângmei chhuak thei lakah fimkhur turin mi tin an chah a ni.