Zokhawthara insumdawn tawnna hmun Tihchangtlun a ni dawn - R Lalthangliana

Commerce & Industries minister Dr R Lalthangliana chuan, Zokhawthara insumdawn tawnna hmunhma chu cheng vbc. 15 sêngin tihchangtlun a nih dawn thu a sawi.

ZPM member VL Zaithanzama zawhna kal zelah Commerce & Industries Minister chuan, Zokhawthar kaltlanga Myanmar nena insumdawn tawnna chu Chief Minister-in a ngaih pawimawh thu a sawi a, "A tihchangtlunna tur cheng vbc. 15 tihfel a ni tawh. Kawng hrang hrangin hma a sawnin, nasa taka hna thawh theih ka beisei. Sum hi central aṭanga hmuh tur a ni," a ti.

Dr R Lalthangliana chuan, Saisih­chhuah kaltlanga Myanmar nena insumdawn tawnna tur buaipui zel a nih thu sawiin, "Myanmar lam chuan Saisihchhuah thleng kawng an rawn lài tlangin an blacktop. Mizoram lamah Páng khaw thleng blacktop a ni a, heta ṭanga Saisihchhuah panna km. 20 vel chei ṭhat ngai a awm," a ti a; Myanmar buaina avangin inbiak theih a nih rih loh thu a sawi. 

Kawrpuichhuaha Bangladesh nena insumdawn tawnna tur bawhzui zel a nih thu sawiin R Lalthangliana chuan, "Kan sorkar hmasak lai khan Tlabunga Facilitation Centre din a ni a, hman ṭangkai a ni vak lo. Nikum khan MHA hnuaia Landport Authority of India-te nen insumdawn tawnna tur hmun kan en. Ram chinfel leh forest clearance tihfel ngai tlem a la awm," a ti.

C&I Minister chuan, India leh Bangladesh inkarah lei (bridge) km. chanve vel cheng vbc. 300 vela dawh ngai a awm tih sawiin, "Sorkar laipuia thuneitute chu lei dawh hma pawha insumdawn tawn kan hmanhmawh thu kan hrilh," a ti a; March 2023 tàwp lamah insumdawn tawnna mumal zawka kalpui theih thuneitute'n an beisei thu a sawi.

VL Zaithanzama zawhna chhangin R Lalthangliana chuan, "Indo-Myanmar Border Trade, Zokhawthar trade point bikah normal trade hman a nih avangin sorkar phal loh item tih loh chu eng item pawh insumdawn tawnna atan kalpui theih a ni," a ti. 

MNF member Dr Vanlalṭanpuia zawhna C&I Minister-in a chhàn danin, tun hnaia sumdawnna lâr tak, khawchhak lam aṭanga rawn lut kuhva chu central subject a nih avangin Mizoram sorkarin a hriatpui lo.