Children’s Science Congress neih a ni

Science Teachers Association, Mizoram (STAM) leh Samagra Shiksha chuan nimin khan Education Centre, Aizawlah state level Children’s Science Congress vawi 28-na an buatsaih a, Rajya Sabha MP K Vanlalvena’n a hmanpui.

MP K Vanlalvena chuan, zirlai ni mekte tan khawvelah hmun a awm tih sawiin, hma lam hun êng tak an nei tih hre tur leh hnual lo turin a fuih a, "Tuna sorkar hnathawk lai, a tê ber aṭanga a lian ber thleng hian liam hun a awm dawn a, politician te, kohhrana pastor rualte pawh chelh din theih lohin hunin a liampui dawn. Tuna zirlaite tan hian heng hnate hi a rawn inher chhuak zel dawn a ni," a ti.

K Vanlalvena chuan, zirlaite chu an thil tum leh nih an duhte chu mi dang ta a ni bik lo a, an ta a ni tih hre turin a chah a; an tum tihlawhtling turin Pathian hnena thlen ṭhin tur te, an tum chu nei tawh ang chiaha rilru hlim leh zângkhai taka inbuatsaih ṭhin turin a fuih bawk.

Children’s Science Congress hawnna inkhawm hi School Education director James Lalrinchhana'n a kaihruai a, Siaha tih loh district dang zawng aṭangin zirlai (child scientist)-te an tel. Zirlaite chuan an zirtirtu (guide teacher)-te nena project an siamte phochhuakin an sawifiah dawn a, project chi 30 a awm dawn a ni.

International Science Fair, Mexico-a tel R Lalnuntluangi leh Lalhruaitluanga, St Pauls HSS zirlaite leh anmahni kaihruaitu Vanneisangi Tochhawng te chawimawina hun hman nghal a ni a; nimin chawhnu khan child scientist-te chu Pachhunga University College-a science laboratory-te fanpui a ni bawk.

State level Children’s Science Congress-ah hian National Children’s Science Congress-a tel tur thlan nghal a ni.