NSS pualin Workshop on Swaachata
Aizawl khawpui chhunga zirna-in hrang hranga National Service Scheme (NSS) programme officer leh volunteer-te pualin nimin khan Aijal Club-ah faina chungchanga inzirtirna - Workshop on Swaachata buatsaih a ni a; NSS programme officer 40 leh volunteer 50 an tel.
A hawnna inkhawm chu Higher & Technical Education additional secretary Lalrinsanga'n a hmanpui a, St. Xavier College assistant professor C Lalengkima'n NSS volunteer-te mawhphurhna leh tih turte a sawifiah. Kum 2021-22 session chhunga NSS volunteer-te'n faina chungchanga hma an lak dan tur sawihona a ni a, action plan an duang nghal a ni.
NSS state officer Dr Zirlianngura'n a tarlan danin, kum 2020-21 chhungin Mizoramah hripui léng vangin nunphung buai mah se, State NSS Cell ruahmannain blood bank hrang hrangah thisen pek huaihawt reng a ni a, NSS volunteer-te'n thisen unit 1,800 vel an pe. NSS volunteer-te chuan Covid-19 chungchangah hma an la a, quarantine facility centre-te an puih bakah, hmai tuamna an siamte chu a thlàwnin an sem ṭhin a ni.
NSS-te chuan kum 2020-21 chhung vekin old age home leh orphanage home-ahte ei leh in tur chi hrang hrang an pe a, hmun hrang hrangah thing 1,700 vel an phun belh bakah, kum hmasa lama an phun tawh 4,000 vel an enkawl zui bawk.