Minister leh MLA hriat dan inang lo

Nimin Assembly session-ah Rural Development minister Lalruatkima leh Lawngtlai West bialtu MLA C Ngunlianchunga ten Vaṭhuampuia hall sak chungchang an hriat dan a inang lo.

C Ngunlianchunga zawhna chhángin RD Minister chuan, BADP 2018-19 hnuaiah Vaṭhuampui Multipurpose Hall tur cheng nuai 40 hmanga sak a nih thu a sawi a, "Plan & estimate anga sak a ni. Bungtlang South BDO enkawlna hnuaiah departmental-a thawh a ni," a ti.

Bialtu MLA C Ngunlianchunga erawh chuan, Vaṭhuampui Multipurpose Hall sakna atana drawing siamah hall chung chu steel roof truss tura tih a nih laiin, thing hman a nih thu a sawi.

RD Minister chuan, steel roof truss ngei hman a nih thu sawiin, building thlalak chu House bungrua atan Speaker hnenah a hlân. C Ngunlianchunga erawh chuan, thing hman ngei a nih thu a sawi thung a, a enfiahtu tur committee din a rawt nghal a ni.

MNF member Lalrinsanga Ralte zawhna chhangin RD Minister chuan an sorkar hnuah MGNREGS hnuaiah ni 100 inhlawhna siam zel theih a nih thu sawiin, "Kum 2020-21 atan February-ah kan pe kim a, 2021-22 atan ni 100 inhlawhna tur hi min pawmpui leh tawh," a ti.