CM-in Serchhip College a tlawh

Chief minister Zoramthanga chuan March 2, Thawhlehni khan hripui vanga hun rei tak chawlh hnua Serchhip College an hawn ṭan lehna hun a hmanpui a; inkhawmah thu a sawi bakah, college hmunhmate a fang kual.

CM Zoramthanga chuan, Mizoramah zirna sang zawka lut tur zirlai an tam tial tial avangin college-te nasa taka thuam ṭhat zel a ni dawn tih a sawi a; khawvela mi ropuite chu mi pangngai, tumruhna ropui bik neia bei ṭhinte an nih thu sawiin, "Khawvelah harsatna hneha mi ropui ni khawpa beitu entawn tur tam tak an awm tawh a, keini pawhin chutiang mite tih ang chu kan ti ve thei a, inkhêk loin kan theihna zawng zawng hmangin kan zirlaite kan zir tur a ni," a ti.

Inkhawm hi Serchhip College principal PC Lalremsiama'n a kaihruai a; college hotute'n admi­nistrative building chu a hlui tawh bakah a chêp tawh avanga sak ṭhat an dilna chu a ngaih pawimawh thu Chief Minister chuan a sawi a ni.