Vairengtea Covid-19 duty-te hlawh sorkarin a batsak rei - ZPM Ṭhalai

ZPM Ṭhalai chuan thuchhuah siamin, Vairengte gate-a Covid-19 duty-te hlawh Mizoram sorkarin a batsak rei thu leh Bairabi Zophaia duty police-te ngaihsak an ngaih thu an tarlang.

ZPM ṭhalaite chuan, March 2, Thawhlehni khan Mizoram leh Assam inrìna an tlawh kual tih sawiin, "Mizoram sorkarin Vairengte gate-a RAT tih hna thawktute hlawh September 2020 aṭangin a la ba char char a, thawktute chhungkua chu mangang takin an awm mek tih kan hmu chhuak a ni," an ti.

Hripui laka Mizoram a him theihna tura thawk­tute ngaihthah an ni chu ná an tih thu sawiin ZPM ṭhalaite chuan, hlawh batsakte chu a rang thei ang bera pe turin Mizoram sorkar an phût a ni.

ZPM Ṭhalai tarlan danin, Vairengteah hian RAT hmangin ni khatah mi 100 aia tlem lote swab sample endik a ni ṭhin a, technician pathum leh laboratory pathum an nei. Technician awm ṭhin zinga eng emaw zat chu bàn an ni tawh a, thawktu dang pawh an indaih lo hle a ni. Hripui léng a la reh loh avangin inthlahdul theih a ni lo a, thawktu indaih lohna phuhrûk a nih theih nan hma la thuai turin sorkar an ngen.

Thawhlehni vêk khan ZPM Ṭhalai hruaitute chuan Bairabi Zophai an tlawh tih sawiin, Assam inthlang tur boruak enin Zophai chu thâ thlah loa vên reng ngai nia a lan thu an sawi a, "Zophaia police duty-na hmunah hian phone signal ṭha an mamawh hle a, sorkarin a rang lamin ngaihven turin kan phút a ni," an ti.

Zophaia Mizoram police duty-te hnenah hian ZPM Ṭhalai president Malsawmzuala chuan tui tihthianghlimna a hlàn a ni.