India-in Pulwama phuba a la IAF-te'n Pakistan firfiak camp an bomb
Pakistan firfiak pawl, Jaish-e-Mohammad (JeM) ten February 14-a Jammu and Kashmir-a Pulwama district-a Central Reserve Police Force (CRPF) convoy an beihnaah sipai 40 in nunna an chan hnuah, nimin zing khan Indian Air Force (IAF) chuan phuba lain, Pakistan ram chhunga JeM training camp a bomb a, firfiak 200-300 vel an thi nia sawi a ni.
Nimin zinga IAF-ten Mirage-2000 fighter jet 12 hmanga firfiak camp an beih hi Surgical Strikes 2.0 tia sawi a ni. Fighter jet-te hi zing dar 3.30 khan Pakistan leh India inrina, Line of Control (LoC) kaltlangin Pakistan ramchhungah an thlawk lut a, Pakistan occupied Kashmir (PoK)-a Muzaffarabad leh Chakoti bakah, Khyber-Pakhthunkhwa province-a Balakot-a JeM camp lian ber leh Alpha-3 control room-te an bomb a ni.
Foreign Secretary Vijay Gokhale chuan nimin zing khan press conference nei nghalin, IAF-ten Mirage-2000 fighter jet hmanga JeM camp an beih thu hi a nemnghet a, he mi rual hian 'non-military, pre-emptive strike' a nih thu a sawi a, "Camp beihnaa firfiak tam tak thi zingah hian senior commander-te pawh an tel a ni," a ti.
Vijay Gokhale sawi danin, camp an beih hi JeM hotu lu ber Masood Azhar-a chhungkhat hnai tak, Mauluna Yusuf Azhar, Ustad Ghaui tia hriat bawkin a enkawl a nih thu sawiin, thi zingah pawh a tel a ni.
Pulwama-a firfiakte pawikhawihna a thlen hnuah, JeM firfiakte hian hetiang ang bawka pawikhawihna rapthlak tak hi India ram chhungah thlen leh an tum tih thu rintlak tak intellingence agency-ten an dawng tih sawiin Foreign Secretary chuan, "Hei vang hian firfiakte nuai chimih an nih theihna tura beih hi thil ṭul leh pawimawh a ni," a ti.
IAF te beihpui thlak rei zawng hi minute 21 niin, fighter jet-te pawh an vaiin him takin an rawn kir leh vek a ni. IAF chuan an beihpui thlak chu a hlawhtlingin an bitum tak, firfiakte camp chu an tichhe vek tih an sawi.
PoK-a firfiak camp bomb chhiat a nih hnuah nimin zing vek khan Prime Minister official residence-ah Cabinet Committee on Security (SCC) meeting neih nghal a ni.
He meeting-ah hian Prime Minister bakah Home minister Rajnath Singh, Finance minister Arun Jaitley, External Affairs minister Sushma Swaraj leh Defence minister Nirmala Sitharaman leh National Security advisor Ajit Doval te an tel.