Sikul kai hun chhung tur siam thar a ni
School Education secretary Esther Lalruatkimi chuan February 25, Thawhṭanni khan notification tichhuakin, kum 2019-20 academic session aṭangin sikul kai hun chhung tur bithliah thar a tarlang.
School Education Secretary tarlan danin, sikul kai hun thar tur chu primary school tan zing dar 9 aṭanga chawhnu dar 2, middle school tan zing dar 9 aṭanga tlai dar 3 leh higher secondary school tan zing dar 9 aṭanga tlai dar 3:30 thleng a ni dawn. Sikul kai hun chhung hian school assembly leh break atan darkar khat hman phal a ni.
Sikul kai hun chhung bituk thar hi sorkar, deficit, government aided leh private school-te zawm vek tur a nih thu tarlangin School Education Secretary chuan, "Dar 8:30-a ṭan duh zawk sikul an awm chuan an ṭan hma chhan duh sawifiahin, School Education Director emaw DEO hnen aṭangin phalna an la tur a ni," a ti.