Sikul naupang 48,179-te mit endiksak a ni tawh

National Programme for Control of Blindness & Visual Impairment (NPCBVI) chuan nimin khan Heath Services directorate conference hall-ah district hrang hrangte leh NGO-te hnathawh dan thlirletna, Review Meeting an buatsaih a; January 2019 thlengin mit naute pâw (cataract) zai tawh zat mi 2,133 an nih thu leh sikul naupang mit endik tawh zat chu 48,179 an nih thu tarlan a ni.

Review meeting hmanpuitu Health principal director Dr F Lallianhlira chuan, district hrang hrang thawk doctor-te chu an hna ṭheuhah taima leh rinawm taka thawk zel turin a fuih. NPCBVI state programme officer Dr Lalrem­mawii'n NPCBVI hnathawh dan leh hmalakna hrang hrang a sawi thung.

Meeting-a tarlan danin, January 2019 thlengin NPCBVI hnuai­ah mit naute pâw (cataract) zai tawh zat 2,133, sikul naupang mit endiksak tawh zat 48,179 leh sikul naupang mit ṭha lo hmuh chhuah zat 6,479 a ni.

Sikul naupang 1,549 leh kum upa mi 2,630 hnenah a thlawnin tarmit pek a ni tawh a, mitthi 93 mit lak tawh niin, chu'ngte hmang chuan mi 30 mit thlaksak a ni tawh bawk.