Road tax-ah duh thlan theih dawn

Transport minister TJ Lalnuntluanga chuan, lirthei chhiah (vehicle road tax)-a lifetime tax (kum 15 chhung) lak ṭhin chu titawpin, road tax pe turte'n duh an thlan theih tur siam a nih dawn tih a sawi.

Vanglaini palai zawhna chhangin TJ Lalnuntluanga chuan, kum 15 atana ṭum khata road tax pek ṭhin chu tihtawp a nih dawn thu a sawi a, "Road tax-ah hian option (duh thlan tur) pathum - kum 5, kum 10 leh kum 15-te thlan theih a ni dawn. A duh tan chuan kum khat zel atana pek theiha siam pawh kan duh a, mahse, hei hi chu thawktu indaih lohna vangin kan ti thei rih lo ang," a ti.

Transport Minister chuan, MNF sorkar tharah sumdawnna atan lirthei permit pek a la nih loh thu sawiin, "Lirthei dinhmunte zirchiangin, permit pek dan turah ruahmanna siam a ni ang. Permit pek chhuah loh tih ngawt chu rilruah a awm lêm lo a, miin eizawnna tak tak atan an hmang dawn em tihte ngaihtuah a ṭul," a ti a; Aizawlah taxi 3,451, city bus 263 leh two wheeler taxi 481 a awm mek thu a sawi.

TJ Lalnuntluanga chuan, sumdawnna lirthei permit hralh chhawn a ni ṭhin chu veiawm a tih thu sawiin, "Permit neitu rokhawm tur ngei hnenah bak permit inhlan chhawn theih loh tura ruahmanna siam kan tum. Hei hian lirthei permit hralh eng emaw chen a vengin kan ring. Permit neitu ro­khawmtu tur hming bakin permit hming a thlak theih tawh dawn loh a ni," a ti. 

Lirthei intlan chhâwk ṭhin chu a ṭha ber em tihte an ngaihtuah thu sawiin Transport Minister chuan, "Mithiam ráwn chungin ruahmanna kan siam ang. Sumdawnna lirthei route system-a an tlan ṭhinte pawh hi a ṭha em tihte ngaihtuah a ngai," a ti a; sumdawnna lirtheite'n sorkar rate bituk angin an tlan leh tlan lohte ngaihtuah chian a pawimawh thu a sawi bawk.