Tripura YMA-in inkhawmpui an hmang

Tripura Group YMA chuan nimin khan Behliangchhip, Zam­puitlangah inkhawmpui an hmang a; khuallian, minister of state Robert Romawia Royte chuan, Mizoram sorkarin Zo fate insuihkhawm a ngaih pawimawh thu a sawi.

Robert Romawia chuan, Zo fate insuihkhawmna atan sorkar tharin chak takin hma a la dawn nia sawiin, "Hnam huapzo sorkar chief minister Pu Zoramthanga kaihhruaina hnuaiah neih a ni ang. State danga awm Zo fate hi YMA hmanga inpawh lehzual a pawimawh," a ti a; ram leh hnam humhalh nan zirna leh taimak uar lehzual turin a fuih.

Ṭhalaite chu beidawng lo a, beiseina thar nena hna thawk tura chahin Robert Romawia chuan, "Mizoram sorkar thar chuan hun rei lo te chhungin chak takin hna a thawk a, Mizoram hmasawnna nana ṭha lehzuala hna thawh mek a ni," a ti.

Khualzahawm H Lalzirliana, MLA pawhin thu sawiin, "Zampui tlangdunga cheng Zo fate hi nêkchepna kara awm ṭhin ni mah se, Mizoram tana himna kulh bang nih reng tum ang che u," a ti a; Mizoram sorkarin Zo hnahthlak hmun hrang hranga awmte a ngaihsak niin a sawi.

Tripura Group YMA hi March 13, 1989-ah din a ni a, a chhungah YMA branch 18 awmin, member 2,496 an ni.