Bru-te tan Kanhmunah E.Roll hearing

Tripura relief camp-a awm mek Mizoram mi Bru-te tan nimin khan electoral roll ennawnna kalpui niin, form 6,7,8A hmangin hearing neih a ni a; Bru 2,836 an inlan.

Thu dawn danin, Bru-te tana Kanhmuna electoral roll ennawnna hi Election Commission of India (ECI) hmalaknaa neih a ni a; nimina hearing-a inlan turin electoral roll-a thun luh dil mi 3,500 vel koh ni mah se, Bru camp aṭangin mi 2,836 an kal.

Bâwngva, Kolalian, Búnghmun, Lusaicherra, Mualṭhuam leh Hmuitlang (Chilui) khuaa mite erawh chuan kohna an hmuh loh avangin an kal lo.

Hetih lai hian, YMA sub-headquarters, Kolasib hruaitute chuan Kanhmunah Bru-te tan electoral roll revision hearing neih a ni tih an hriat veleh Kanhmun pan nghalin, an dodal thu an thlen. Mahse, Bru lamte'n, 'Mahni sum leh pai séngin hei leh chen kan lo kal tawh a, sawiselna a awm dawn tih hre lâwk ila, tumah kan lo kal lo ang,' an tih avangin hearing chu neih chhunzawm a ni a; YMA hruaitute'n an dodal zui lo niin an sawi. 

Aizawla NGO Co­ordination Committee lam chuan Kanhmunah hearing neih a nih tur thu an hre lo nia thu dawn a ni.