Aizawlah V/C inkhawmpui neih a ni

27th February, 2019

Nimin khan Pachhunga University College (PUC) Auditorium-ah All Mizoram Village Council Conference 2019 ṭan a ni a, Local Administration Department (LAD) minister K Lalrinliana khuallian a ni. Minister chuan, Mizoram sorkarin V/C dinhmun ṭha zawka dah tumin hma a la mek niin a sawi.

LAD Minister chuan, V/C member-te chu inkhawmpui an neih mek hmang ṭangkaia Mizoram tana thil ṭha pawchhuak ngei turin a fuih a, "Mizoram sorkarin V/C dan thar siam tumin hma a la mek a, SEDP-ah ziah lan a nih ang leh India danpui duh dan milin, Mizo hnam leh khawtlang nun zia tibo chuang si loa V/C-te mawhphurhna tipung tur leh dinhmun ṭha zawka an din theih nan hmalak mek a ni," a ti.

V/C-te'n Excluded Area Fund an dawng thuai dawn tih sawiin K Lalrinliana chuan, fund an dawnte chu ngaihtuahna zau zawk pu chunga uluk taka hmang turin V/C member-te a chah a; an khua/veng tana rotling siam tur leh an tu leh fate ṭhan lenna tlaka buatsaih turin sum leh pai an dawnte dik taka hmang turin a fuih.

K Lalrinliana chuan, SEDP chu eizawnna ngêlnghet nei lo chhungkuate'n eizawnna ngêlnghet an neih theihna tura duan a ni tih sawiin, "V/C-te pawhin an khawtlang tana ruahmanna ṭha leh felfai kalpui a nih theih nan an inbuatsaih lawk a pawimawh," a ti.

Mizoram Village Level Citizen Registration kalpui tum a nih thu sawiin, "Mahni khua ṭheuhah tute nge chêng a, eng nge an mamawh tih V/C-te'n an hriat a ṭul," a ti.

LAD Minister chuan, V/C-te chu thubuai rem kawngah te, ram kâng tur ven kawngah te, ran khuahkhirhnaah te, ramngaw humhalh chungchangah leh thil dang dangah mawhphurhna lian tak an neih hre thar turin a chah a; dan loa khaw din chungchangah, mawhphurhna la a, en chiang a, khap ṭhin tur leh din lui an awm chuan sorkarah thlen ṭhin turin a chah bawk.

V/C inkhawmpuiah hian Mizoram pum aṭangin V/C member 2,000 chuang an kalkhawm a; chawhnu lamah LAD joint director C Lalthlamuana kaihruaiin Poshan Abhyan, Health Care (AB-PMJAY) leh bio-diversity management chungchang an zirho a ni.

Conference hi vawinah chhunzawma zawh a ni ang.