Hmasawnna hnathawh thlirho

Lunglei District Development Coor­dination and Monitoring Committee (DISHA) chu nimin khan an chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an ṭhu a; sorkar laipui scheme hnuaia hmasawnna hnathawh hrang hrangte an thlirho.

Meeting-a tarlan danin, Lunglei district-ah hian sorkar kum kal mek 2018-19 chhungin MGNREGS hnuaiah Lunglei RD Block-ah ni 75, Hnahthial RD Block-ah ni 75, Lungsen Block-ah ni 75 leh Bunghmun Bloack-ah ni 77 inhlawhna siam tawh a ni a; job card holder-te account-ah January 22, 2019 thleng khan cheng nuai 6845.46 thun a ni tawh.

Individual House Hold Latrine hnuaia ek-in sak tur sak zawh a ni tawh a, kawngpui dungah km 47.41 thing phun a ni. Pradhan Mantri Awas Yojana - Gramin PMAY-G hnuaiah in 865 sa tura ruahmanna siam mek a ni a, in 376 sak zawh tawh a ni.

PMGSY hnuaiah kawng siam hna kalpui mek a ni a; tun dinhmunah Tlabung-Diblibagh kawng (km. 6.384), Mau­zam-Puankhai kawng (km. 11.120), Tlabung-Chawilung kawng (km. 20.90), Marpara-Laisawral kawng (km. 39.71), South Vanlaiphai - Muallianpui kawng (km. 13.50), Bunghmun-Sesawm kawng (km. 10.57), Chawngte-C - Bejeisora kawng (km. 2.20)-te thawh chhunzawm mek a ni.

Swachh Bharat Mission (Gramin) hnuai­ah Rs. 11,92,92,000 sêng­in mimal êk-in Individual House Hold Latrine (IHHL) 9941 sak zawh a ni tawh a, Lunglei district pumpui open defecation free (ODF)-a puang turin a enfiahtute'n an endik mek.

April-December 2018 chhungin nausen kum khat hnuai lam thi 33 an awm a, Infant Mortality Rate (IMR) chu 19 (nausen 1,000 zelah 19 an thi tihna) a ni a; nu pahnih nau chungah an thi. Sikserh vei mi 1,036 zingah mi 972 chu Pf an ni a, denque vei mi pathum hmuh chhuah a ni bawk.