Zo hnahthlakte rorelna pakhat hnuaiah Kan la awm ngei ang - Rinliana Sailo

Biate Area Mizoram Upa Pawl (MUP) Meet vawi 24-na chu ni­min khan Riangtlei commu­nity hall-ah neih a ni a; khuallian Lalrinliana Sailo, Assembly speaker chuan, Zo hnahthlakte rorelna pakhat hnuaia an la khawsak ngei a rin thu a sawi.

Lalrinliana Sailo chuan, Zo hnahthlak hmun hrang hranga awmte chu engtikah emaw chuan rorelna pakhat hnuaiah an la khawsak ngei a rin tlat thu sawiin, "Lungrual leh inrem taka khawsakho a pawimawh hmasa a ni," a ti.

Assembly Speaker chuan, MUP member-te chu kum lamah upa tawh mah se, ram tana thawh hlâwk tak an nih thu sawiin, an tawnhriat thiamna leh finna  hmanga ram khalh ngil theitu an ni tih hre thar leh turin a chah.

MUP Biate area-ah hian khaw panga - Biate, Sialhawk, Tlangpui, Tlangmawi leh Riangtlei-te an awm a, MUP mem­ber 695 (mipa 326 leh hmeichhia 369) an awm mek a ni.