KHAWTHLIR

Central YMA, Zoram Drivers Union, Mizoram Merchants Association, Aizawl City Bus Owners Association, MTA leh ATTA hruaitute nimina CYMA pisaa ṭhukhawm chuan, kumin Chapchar Kût chu hlim leh hlawhtling taka hman a nih theih nan mahni pawl ṭheuhah hnam incheina inthuam tura hmalak an rêl. Chapchar Kût nía Mizo hnam thuam inbelte chu chuan man (fare) an ngaihnathiam dawn a, MIMA-in anmahni dawrtu Mizo thuama inbelte chu a theih ang anga a man tihhniamsak an rel niin CYMA thuchhuah chuan a tarlang.

Mizoram sorkar chuan Mizorama awm mek IAS officer palite awmna hmun a sîksawi a, February 25, Thawhṭanni khan notification a tichhuak. Higher & Technical Education director R Zarzosanga chu School Education director-ah, Transport director Krishna Mohan Uppu chu special secretary-ah, Mizorama awm thar SL Vaveen chu Transport director-ah leh School Education director Kesavan R chu Higher & Technical Education director-ah dah an ni.

Pangzawng Venglai Branch YMA chuan nimin khan an YMA Hall-ah an kum 50-na, golden jubilee an lawm a, Hnahthial BDO H Lalramliana'n a hmanpui. Jubilee lawmnaah hian Environment, Forest and Climate Change department-in ramngaw leh nungcha humhalh chungchangah awareness campaign an nei nghal a ni.

Horticulture department chuan nimin khan Chapchar Kût pualin an directorate tualah flower show an buatsaih a, Horticulture Development Committee vice chairman Prof. F Lalnunmawia, MLA-in a hawng. 

Mau industry tihphuisui nan Mizoram Bamboo Mission chuan Agartala, Tripura-a training turin mi 20 a tír a, nimin khan Agratala an pan. Training tura kalte hi Reiek, Kawnpui, Khanpui, Zemabawk leh N.Chaltlang khuaa mite an ni a; Bamboo and Cane Development Institute, Agratala-ah furniture, basketry, turning product leh unility item siam dante thla khat chhung an zir dawn a ni.