Aizawla kawtthler cheiin lawm a hlawh

Krismas leh Kumthar vuakvetah Aizawla veng hrang hrangin an kawtthler leh kawnte an chei a, hunpui âwllen laiin mipuiin an tlawh nasa hle.

Mipui hip ber nia lang Chal­tlang lamin an veng kawtthler thui tak an chei mawi a, Krismas kaihhnawih thilte bakah en­nawm chi hrang hrang an siam a, ṭhalai leh naupangte'n thla an lakpui theih turin an chei bawk a, mipuiin an lawm hle. Ruaiṭheh zanah (December 26 leh January 2) phei chuan mipui tana veivah harsa khawpa lirthei a tam bakah thlalakna hmunah mipui an intlar thui thei hle.

Sikulpuikawn pawh kum dang ang bawkin mawi takin an chei a, Mission Veng khaw­tlangin enkawlin kawn chei tlawhtute tana remchang eng emaw zat an siam. Thlalakna tur hmun bik an siamte a lûnin rei tak nghah a ngaih chang a awm a, 'theme' neiin rawng var leh silver lam hawiin an chei a, a hmun a laili bawk avangin chawl loin mipui an awm reng a ni ber mai. Kawn chei lama veng hmingthang tak Bungkawn pawhin an kawn chu hmuh­nawm takin an chei leh a, a tlawhtute tana remchang siamin khawtlangin uluk takin an vil reng bawk. Veng inlungrual Tuikhuahtlang khawtlang pawhin an kawn chu thiam takin an chei leh a, thlalakna turte an siam bakah hmuhnawm chi hrang hrang an dah thiam hle.

Durtlangin Mual Veng lam an chei a, a tlawhtute'n an hlutin a panna hla deuh mah se mi an ṭhahnem thei hle a, khaw vawt hnuaiah pawh zan khaw tairek thlengin thla la tur leh tlawhtu an nei âwl lo.

Khatla East kawtthler phei pawh hmuhnawm takin an chei a, Ramhlun South-in an biak in kawtah thlakna remchang tak bang lian danglam tak an siam bakah a step chhukna hmuhnawm thamin an chei a; Tlangnuam West lam kawn chei pawhin mipui a hip hle. Hei bakah hian veng ṭhen­khatin an kawn remchangte cheiin Krismas leh Kumthar hun nuam leh hlimawm zuala mipui mimirin an hman theihna turin remchang an siam bawk a ni. Kawtthler leh kawn cheite hi tlawh theihin a la awm reng a ni.