Magnitude of Substance Use in India 2019 tehnaah Mizoramah ruihhlo ti an tam Zu in tlem lamah Mizoram 10-na
Mizoram Social Defence & Rehabilitation Board (MSDRB) leh Mizoram University (MZU)-a Pyschology department ṭangkawp chuan, nimin khan MZU-ah zirlaite pualin ruihlo hmansualna laka invên lâwk dan zirhona an buatsaih. He hunah hian India ram pum tehnaah ruihhloah Mizoram dinhmun a chhiat viau laiin zu in tlem lamah 10-na a ni thung. he hun hi Social Welfare minister Dr K Beichhua-a'n a hmanpui.
SWD Minister chuan, Mizoram chu state rálmuang leh hmun nuam tak a nih rualin, ruihhloin a tihbuai an tam lutuk chuan lawm a tikim lo tih a sawi a, "Thil pawi tak a ni a, ruihhlo hi mi zawng zawngin kan ngaihmawh leh kan do tlan tur a ni. Ruihlo vanga kan harsatnate sut kiang tumin mi tlawmngaite'n theihtawp an chhuah ṭhin a, zirchianna leh behchhan mumal tak, scientific approach a la awm hma a nih avangin kan dinhmun chiang tak hriat leh sâwt zawka hmalak chu thil har a ni ṭhin," a ti.
Kum 2017 khan sorkar chuan chiangkuang taka ruihhlo zirna baseline assessment a nei tih sawiin K Beichhua chuan, "Mithiamte'n a hmuhchhuah tâk chu, ruihhlo ngai zinga a tam ber chuan kum 15 vel an nih aṭangin phalna neia zawrh ruihlo - vaihlo leh hnim chi aṭangtein an ti ṭan a, kum hnih/thum hnuah zu, ganja leh a dangte an chíng a, kum 19-20 an nih chuan ruihhlo hlauhawm zawk an chíng ṭhin," a ti a; zirchianna chu ruihhlo vanga harsatnate sutkian kawngah a ṭangkai tur thu a sawi.
Dr K Beichhua chuan, ruihhlo laka ṭhalaite venhim sorkarin a ngai pawimawh tih sawiin, "Awareness campaign nasa zawka kalpui a ni dawn a, MZU zirlaite puala ruihhlo hman sualna laka invenna chungchang inzirtirna hi a bul ṭanna a ni. Mizoram pum huap, hmun kilkhawr berte pawh thleng vek turin SWD hnuaiah MSDRD kaltlangin sorkarin ruahmanna a siamte a kalpui dawn a ni," a ti.
Inkhawm hi MZU Psychology department-a professor HK Laldinpuii'n a kaihruai a, MZU vice chancellor Prof. KRS Sambasiva Rao, SWD director Laldikkimi leh MZU dean Dr Lalngurliana Sailo-te pawhin thu an sawi.
Ministry of Social Justice & Empowerment-in February thla tir lamah Magnitude of Substance Use in India 2019 a tlangzarh a, chutah chuan ruihhlo lamah Mizoram dinhmun a ṭha lo hle tih tarlan a ni. Zirchiannaah hian ram pum huap leh state pakhat chhung khaikhin zel a ni a, ruihlo chi hrang hrang leh a hmangtu tam zawng tarlan a ni.
Magnitude of Substance Use in India 2019-a a lan danin, ganja bikah ram puma ti zat chu 1.2% a nih laiin Mizoram bika ti zat chu 3.2% a ni a, India ram state zingah a sang ber zinga mi a ni. Heroin, opium leh pharma opoid-ah ram pum huapin 0.70% a nih laiin, Mizoram chu 6.90% a ni.
Zu in zat chu India ram pumah 27.3% an nih laiin, Mizoramah chuan 15.1% an ni thung a, a hniam lamah 10-na a ni.