Start Up India, Mizoram Yatra kalpui mek

Mizoram ṭhailaiten mahni kutkawiha eizawnna kawng an dap theihna atana pui turin 'Start Up India, Mizoram Yatra' kalpui mek a ni. Yatra hi February 25, Thawhṭanni khan mi­nister of state TJ Lal­nuntluanga'n a vai liam a, March 5, 2019 thleng kalpui a ni dawn. 

Yatra hi sorkar laipuia Depart­ment of Industrial Policy & Promotion hnuaia Start Up India leh Mizoram sorkara Planning & Programme Implementation department hnuaia EDS Cell-in an buatsaih a ni a; Minister-in a vai liam hnuah Yatra van chuan Aizawl khawpui fangin, J Thankima College leh Synod Higher Secondary School-ah hun hman a ni.

Yatra van hi February 22-ah Kolasib College-ah a kal tawh bakah, February 26, Thawhlehni khan Champhai College-ah a kal leh a, nimin khan Lunglei College-ah kalin hun an hmang leh bawk.

Nimin vek khan Aizawlah booth camp neih a ni a, vawiinah Lungleiah booth camp neih a ni leh ang. March 5-ah Aizawlah grand finale neih a ni dawn a, intihsiakna hrang hrang neih tur a nih bakah, category hrang hrangah award sem a ni ang.

Start Up India, Mizoram Yatra-ah hian award hrang hrang - Start Up Hero of the State (Rs. 1,00,000), Most Innovative Idea - Agriculture (pakhatna Rs. 70,000, pahnihna Rs. 50,000 leh pathumna Rs. 30,000), Most Innovative Idea - Technology (pakhatna Rs. 70,000, pahnihna Rs. 50,000, pathumna Rs. 30,000), Most Innovative Idea - Social (pakhatna Rs. 70,000, pahnihna Rs. 50,000, pathumna Rs. 30,000), Top Women Entrepreneur (pakhatna Rs. 70,000, pahnihna Rs. 50,000, pathumna Rs. 30,000)-te siam a ni dawn.

Intihsiaknaa tel turin van stop hrang hrangah ṭhalai an inziak lut a, nimin thleng khan mi 300 chuang an inziak lut tawh. Registration hi boot camp-ah-ah pawh tih zel theih a ni ang.

Start Up Yatra-in a tum ber chu, mahni kutkawiha eizawnna kawng zirtir leh a tui mite intihsiakna hmanga hmasawn tura chher chhuah a ni.