Chama'n Vaṭhuampui mipuite Chî-âi lo turin a chah
Home minister chuan February 26, Thawhlehni khan Pang Zirlai Pawl (PZP)-in Vaṭhuampui khuaa 'Zoram zalenna sual laia Páng fa martarte hriatrengna lungphun' an siam chu a hawng a; thu sawiin, an khuaah sipai an awm vanga chî-âi lo turin Vaṭhuampui khaw mipuite a chah.
Home Minister chuan, rambuai lai ang a nih tawh loh thu sawiin, "Sipaite hi mipuite venghim tur an nih avangin hlauh tur a awm lo. Sipai an awm avangin mipuite chî-âi loh tur. Harsatna in tâwk a nih pawha ṭanpui nghal tur che u-in district administration leh sorkarin mit leh beng a chhi reng a ni," a ti.
Lalchamliana chuan, Mizoramin zalenna a sual vanga thi zawng zawng chu hnam martar an ni tih chu sorkar lai MNF party-in a pawm dan a nih thu sawiin, "PZP-in Páng fate zinga chutiang mi zawng chhuak a, hriatrengna lung phun nachang an hria hi a lawmawm hle," a ti a; MNF chu martarte thisena bual thianghlim an nih thu a sawi.
MNF-in inthlan manifesto-a an tarlan, 'Hnam pasalṭha leh martar chhungte tan special scheme siam tum a ni ang' tih chu a taka bawhzui a nih dawn thu sawiin Minister chuan, "Martar 1,564 hming chuanna Luangmuala Martarte Thlanmual pawh ṭha zawka siam tum a ni," a ti.
Home Minister chuan, Mizo mipuite tana ṭha ber tura a ngaih avangin MNF-in zalenna a sual tih sawiin, "Mipuite tana ṭha ber tura a ngaih avangin India sorkar nen inremna siam leh a ni," a ti a; MNF leh India sorkar inremna chu tun thlenga vawnhim a nih thu a sawi.
MNF chuan Zo hnahthlak zawng zawng rorelna pakhat hnuaia mahni ro inrela kan awm theih nan hma an la zel dawn tih sawiin Lalchamliana chuan, "Tharuma kan beih hlawhchham tawh chu tharum tel loa beih chhunzawm zel kan tum," a ti.
Lungphun hawnna inkhawm hi PZP vice president James C William-a'n a kaihruai a, assistant general secretary Lalhmangaihzuala'n martarte chanchin chhiar chhuakin, martarte sûnna hun hman a ni.
PZP bul tuma martarte hriatrengna lungphunah hian martar 11 hming a chuang a, a huna report lut hman lo mi dang panga nen, tuna Páng hnam martar hriat theih chu mi 16 an ni. PZP chuan martarte la zawn chhunzawm zel an tum.