Motor chesualah mi pathum an thi

Nimin zing dar 8:30 vel khan Ṭawipui North-II leh Ṭhualṭhu inkarah Lawngtlai aṭanga Lunglei pana tlân, Home Minister zuitute zinga motor pakhat chu chesualin, kawng thlangah a lum a, a chhunga chuang zinga pathum chu a hmunah thiin, mi dang pahnih an hliam.

Thu dawn danin, motor Bolero MZ-01 L-3514 hi police motor a ni a, a chhungah driver nen mi panga an chuang. 

Chetsualnaa a hmuna thite chu - MNF general secretary leh Aizawl City Bus Owners Association president ni mek R Lalnunsanga (55) h/o PC Vanlalhruaii, Dinthar, Aizawl; motor khalhtu K Lalchungnunga (46) h/o Zohmingthangi, Armed Veng South leh, Ex-MNA zinga mi F Ropianga (72) h/o Khawlthangi, Tuithiang, Aizawlte an ni.

MNF party mi Lal­hmingliana Hnamte, Chawnpui, Aizawl leh Home Minister personal assistant Zaithanmawia Chhangte, Zemabawk-te an hliam a, chetsualna hmun aṭanga lak chhuah an nih hnuah Lunglei panpui niin, Civil Hos­pital-ah enkawl an ni.

Chetsualna thlenna hmunah hian Home minister Lalchamliana pawh a awm zui a, nimina Lungleia a hun hman turte chu a ṭhulh. 

Mitthite hi Ṭawipui North-II khawtlang chuan kuang an siamsak a; nimin chawhnu lam khan thlahna hun hman a nih hnuah Lunglei Civil Hospital-ah an ruang endik (postmortem) a ni a, nimin tlai khan Lunglei aṭang­­in Aizawl panpui an ni. 

Home minister Lal­cham­liana chhim lam zin haw lam, a zuitute zinga lirthei chetsual vanga mi pathum an thi leh mi pahnih an hliam chu pawi an tih thu, MNF party leh Zoram Peoples' Movement (ZPM)-te chuan thuchhuah siamin an tarlang. 

MNF chuan, chet­sualnaa thi mi pathumte chu an sûn thu leh an chhungte an tawrhpui thu an tarlan a, hliamte pawh dam leh thuai turin duhsakna an hlan a ni.

ZPM chuan, "Home minister Pu Lalchamliana chhim lam zin hnungzuia kalte Aizawl an lo let leh lam motor accident tâwka nunna hial an chán hi pawi kan ti tak zet a, nunna chán ta mi pathumte thinlung takin kan sún a, an chhungkhat laináte zawng zawng Pathianin thlamuanin awmpui zel se kan duh tak meuh a. Accident-a hliamte pawh dam taka damdawi-in aṭanga an chhuah ngei kan duhsak tak meuh a ni," an ti.