Chapchar Kût puala thil buatsaihte hawng

Chapchar Kut puala Food Court, Handloom & Handicraft Exhibition, Photo Exhibition leh Painting Exhibition-te chu nimin khan hawn a ni.

Food Court leh Handloom & Handicraft Exhibition hi Lammuala basketball court-ah minister K Lalrinliana'n a hawng a; Minister chuan, food court leh Handloom & Handicraft Exhibition chu ramin hma a sawn phahna atan leh eizawnna tihchangtlunna atan rahbi pakhat a nih a beisei thu sawiin, mipuite chu exhibition-ah hun nuam tak hmang turin duhsakna a hlan.

Food Court leh Handloom & Handicraft Exhibition hi March 1 thleng hawn tur a ni a, services stall 11, food processing stall pakua leh handloom & handicraft stall 20 a awm.

IPR department, Art & Culture department leh Mizoram Photographer Society-te chuan Vanapa Hall-ah Photo Exhibition an buatsaih a, nimin khan chief secretary Lalnunmawia Chuaungo-in a hawng.

Chief Secretary chuan, Mizo nun leh Mizoram tláng mawi tak takte pholang thei thla la thiam Mizo zingah an awm chu lawmawm a tih thu sawiin, "Mizoram páwnah leh hnam dangte zingah pawh thlalakte hi pholan tham a ni," a ti. Photo Exhibition-ah hian mi 56-te thlalak 140 an pho chhuah a ni a, lei theih a ni.

Painting Exhibition chu IPR department leh Mizoram Art Development Society-in Aizawl Art Gallery-ah an buatsaih a, nimin vek khan Planning secretary Dr C Vanlalramsanga'n a hawng.

Dr C Vanlalramsanga chuan, lemziak mite chu Mizo zia leh nunphung pholangtu pawimawh an nih angin, mawhphurna sang tak an nei tih a sawi a, "Zo ti-Zo-tu leh Zo zia mi dang bulah hrilhfiah thei chu lemziahte hi a ni. Art-te hi hnam zia tilang thei hmaraw pawimawh leh ṭangkai tak a ni," a ti.

Chapchar Kut Painting Exhibition-ah hian MADS member 32-te kut chhuak 55 pho chhuah a ni a, March 1, 2019 thleng a awh ang.