State Water Policy tlangzarh

Irrigation & Water Resources (IWR) minister C Lalrinsanga chuan nimin khan IWR Chief Engineer committee room-ah Mizoram State Water Policy-2019 a tlangzarh.

IWR Minister chuan, Mizoramin a vawi khatna atan water policy a nei ta chu ram tana chhinchhiahtlak a nih thu a sawi a, "He policy hian tui hlutna leh vawnhim a ṭulzia a tilang a, tu leh fate tana tui kan khawl loh chuan nakinah la kiam mai thei leh harsatna tâwk thei kan nih dan min hriattir a ni," a ti.

Mizoram State Water Policy 2019 hi India leh Germany thawh dunna hnuaiah GIZ (German company) mithiamte kaihhruainain IORA Ecological Solutions Pvt. Ltd., Delhi-in an siam a ni. Policy duang turin Mizoram sorkarin Chief Secretary kaihhruaina hnuaiah Task Force a din a, Task Force kaltlangin department hrang hrang - IWR, PHE, Environment & Forests, Power & Electricity, Soil & Water, Agriculture, Horticulture leh Fisheries deparment-te nen inráwna duan a ni.