Bru-te tana hearing neih ZPM-in hrethiam lo

Zoram Peoples' Movement (ZPM) chuan thu­chhuah siamin, Tripura relief camp-a Bru, Mizoram electoral roll-a inthun dil mi 3,500-te pual bika Kanhmun, Mizorama hearing neih a ni leh Bru mi 2,836-te hearing neihpui an nih thu an tarlang a, "Kan hrethiam lo tak zet a ni," an ti.

ZPM chuan, relief camp-a Bru-te chu Tripura camp-a ṭanhmun khawh tlat, vawi tam tak Mizorama kîr tura state sorkar leh central sorkarte'n an lo hriattir fo tawh, Mizoram NGO Coordination Committee pawhin theih­tawp chhuah­a an sawm tawh an ni a, mahse, Mizoramah an let duh lo tih sawiin, "Eng emaw zat chu Tripura-a piang an ni nghe nghe," a nti a, Mizorama kîr duh si lo, Mizorama vote neih duh bawk site pual bika hearing neih chu an hriat­thiam loh thu an sawi.

ZPM chuan, Bru-te hearing neihsaktute chu Bru-te dinhmun dik tak hria a, buaina lian zawk cho chhuak lo zawnga thutlukna siam thiam tur­in an ngen a ni.