V/C inkhawmpui chhunzawm a ni
Nimin khan Pachhunga University College auditorium-ah Mizoram Village Council Conference 2019 chhunzawm a ni a, Rural Development minister Lalruatkima'n a hmanpui.
Inkhawmpui hi SIRDPR director Maria CT Zuali'n a kaihruai a; minister Lalruatkima chuan, khawtlang neitu tak tak village council-te inkhawmpui chuan ram hmasawmna a thlen a beisei thu sawiin, "Mizoramah lalte bân an nih hnuah, kum 1954 aṭang khan V/C neih ṭan a ni a, khawtlanga mawhphurhna a chhia leh a ṭha zawng zawng an koah a innghat a ni," a ti.
Lalruatkima chuan, sorkarin mipui thleng phâk tak taka hna thawk tur chuan thingtlanga a hniam ber aṭanga beih a ngai a ni tih hriain, local self government pawh a dah pawimawh telh telh tih a sawi a, "V/c-te thlâwpna tel lo chuan sorkar pawhin mipui tana a ruahmanna siamte a hlawhtlinpui thei lo ṭhin," a ti a; khawtlang hruaitute nena thawhhona ṭhain hnathawh tlo, tha leh mawi a chhuah ṭhin tih a sawi.
RD Minister chuan, khawtlang tana V/C hmalakna hrang hrangte bakah sorkar hmalakna an kalpuite chu fel taka an hnathawh dan record vawn a pawimawh thu a sawi a; V/C member-te chu an huam chhunga ramngaw, nungcha leh lui/tui humhalh ṭha turin a chah.
V/C conference ni hnihnaah hian thupui hrang hrang - MGNREGA, Gram Sabha, faina leh khawtlang enkawl hmasawnna kawnga hmalak dante zirho a ni.
Mizoram puma V/C thawk ṭha hming 30 lut zingah pakhatna chu Chiahpui V/C a ni a, lawmmanah Rs. 30,000 an dawng a; pahnihna Khawlailung V/C hnenah Rs. 20,000 leh pathumna Darlawng V/C hnenah Rs. 10,000 hlan a ni bawk.