KHAWTHLIR

Mizoram sorkar leh Central YMA huaihawtin vawiin hian Lammualah Chakchar Kût hman ṭan a ni dawn a, naktukah chhunzawm a ni ang. Vawiinah Kûtah chuan Art & Culture minister R Lalzirliana kût pa a ni ang a, Art & Culture secretary B Lalhmingthanga kût thlengtu a ni dawn. Kûtah hian hnam lâm leh zai chi hrang hrang entir a ni ang.

Mizoram sorkar chuan Information Commissioner atan Dr C Lalzirliana a dah thar. Hemi chungchanga hriattirna hi nimin khan IPR department secretary-in a chhuah a, thutiam (oath) a lak hnua thawk ṭan tura tih a ni. Dr C Lalzirliana hi Trade & Commerce director ṭhin a ni.

Tuichangral North Group YMA chuan nimin khan Tlangpui khuaah inkhawmpui an hmang a, Assembly speaker Lalrinliana Sailo-in a hmanpui. Tuichangral North Group YMA hnuaiah hian khaw pakuaa YMA branch 10 a awm a, member 4,000 vel an awm a ni.

Mizoram Veterinary Service Association (MVSA) chuan February 25, 2019 tlai khan Selesiha Vety Rest House-ah inkhawmpui an hmang a, AH&Vety minister Dr K Beichhua-a'n a hmanpui. AH&Vety department hi kum 1974-ah Agriculture department aṭangin joint director kaihhruai turin an indang a, kum 1980-ah director nei ṭanin, department puitlinga hlan kai a ni. MVSA-ah hian member 101 an awm mek. 

Govt. Aizawl College NSS unit chuan nimin khan an college-ah blood donation camp an huaihawt a, Aizawl Civil Hospital tan thisen unit 132 an pe a, a petute mipa 101 leh hmeichhia 31 an ni.

UDPA department chuan Swachh Bharat Mission (Urban) hnuaiah nimin khan Mamit khawpui tihfai hnatlang an huaihawt a, Mamit khawpui chhunga kohhran hrang hrang ṭhalai pawlte an thawk chhuak. Hnatlangah hian KṬP, SAY, ṬKP leh IKK ṭhalai pawlte aṭangin mi 300 vel an thawk chhuak a, Mamit veng hrang hranga kawngpui dungte phiat faiin, tuihâwk luankawrte an tifai a ni.