Sorkarin thlai a buaipui dan zir chiang Loneitute hmakhua ngaih vangin Thlai man a to deuh - Horti. Director

Serchhip District Consumers Association (SDCA) chuan inkharkhip vanga sorkarin Vegetable Supply Chain Programme a ruahmannaa Serchhip aṭanga zikhlum leh thlai dang Aizawla a hlâwma phurh thlâk leh hralh danah Serchhipa zîkhlûm thartute demna leh Aizawla local task force (LTF)te demna lam hawia sawi a awm avangin Serchhip aṭanga zikhlum leh thlai dang hralh leh lei dan an zir chiang a ni.

SDCA tarlan danin, March 31, 2020-ah pick-up MZ-06 3956 hmangin Aizawlah zîkhlûm phurh a ni a, a khultu tur Nursery Veng LTF hnenah pek nghal a ni. Document leh LTF-te aṭanga thu an dawn danin, supplier (Horticulture)-in driver hnenah Rs. 58,935 receipt an pe a, chutah chuan motor hman man a tel. Chutih laiin, a khultu LTF hnenah Rs. 79,535-a hralh a ni a; pick-up phur khatah Rs. 20,600 an hlép tihna a ni. March 31-ah vêk pick-up MZ-03 6998 hmangin Serchhip zikhlum Aizawlah lak leh a ni a, Aizawlah lo dawngtu tur an awm mai loh hnuah Tuikual South LTF-ah kaltirin, thlaite chu hlàn thlâk a ni.

Horticulture department-in driver hnena receipt an peka pawisa zat inziak chu Rs. 60,970 a ni a, LTF-in an khulna erawh chu Rs. 86,820 a ni thung a; Rs. 25,850-in a inthlau. Horticulture department-in zîkhlûm chu kg. khat Rs. 2530 hisápa la angin an insawi a; Aizawla LTF-te hnenah kg. khat Rs. 40 anga an hralh leh avangin, kg. khatah Rs. 10-15 zel an hlêp tihna a nih thu SDCA chuan an tarlang. Zîkhlûm leina leh LTF hnena hralh lehna pick-up phur khatah cheng sing hnih chuanga a inthlauh chungchangah hian a buaipuitu MIZOFED, Aizawla hotute chuan, a rate chu MIZOFED siam a ni lo a, Vegetable Supply Chain Committee thutlukna ang leh Trade & Commerce lam aṭanga thur âwn anga ti an nih thu an sawi.

Vegetable Supply Chain hnuaiah Serchhip aṭanga zîkhlûm lakna hmasa berah hian, department lam thuchhuahah loneitute aṭanga an lakna chu kg. khat Rs. 25-30 vel a nih laiin, loneitute chuan Rs. 20 an chan thu an sawi tih SDCA chuan an tarlang bawk. SDCA-in an zir chianna report hi April 2, Ningani khan Serchhip DC-ah an thehlut a ni. Hetih lai hian, Horticulture director Elizabeth Saipari chuan  thuthar thehdarhtute zawhna chhangin, Aizawl, Kolasib leh Serchhip district aṭangin thlai lirthei phur 60 chuang an lei tawh thu a sawi a, "Thlai lei tur a la awm reng a, task force lamin an mamawh ve reng avangin task force leh damdawi-in lam ngaichâng chungin kan lei," a ti a, a ṭul dan azirin thlai lei zel a nih tur thu a sawi.

Horticulture Director chuan, thlai an hralh to deuh chhan chu loneitute hmakhua an ngaih vang nia sawiin, "A hmaa khârchhâwng hnena an pek ṭhinna rate aia toin kan leisak. Chubakah, kawng laka ṭawih leh hralh zawh hmaa ṭawih chhiate a awm ṭhin. Chuvangin, chawi belh a nasat lutuk loh nan a rate siam rem ve a ngai a ni," a ti. Loneitute hmakhua an ngaih thu sawiin Dr Saipari chuan, "A rawn thlenin chhe deuh tawh mah se loneitute'n an rawn thawn ang ang chu a man pek zel kan duh," a ti a; loneitute'n tun hma aiin thlai an hralh ṭha zawk niin a sawi.