MNF nihna martarte thisenin a tichiang BJP kan ṭan ngai lo- MNF President

Mizo National Front (MNF) chuan nimin khan Vanapa Hall-ah zalenna an sual laia martar 17-te thlahna inkhawm an buatsaih. Thu sawitu MNF president Zoramthanga, chief minister chuan, MNF nihna chu martarte thisenin a tihchian thu a sawi a, "MNF hian BJP kan ṭan ngai lo," a ti.

MNF President chuan, NDA-a an tel avangin BJP lamṭangah puh an nih ṭhin thu sawiin, "BJP kan ṭan ngai lo a, an party kan ni ngai hek lo. Ṭawngkam thiam takin eng ang pawhin sawi mah se, martarnaa nemngheh hi ṭawngkam thiamnaa sawi danglam theih a ni lo," a ti a, MNF chu MNF a nih tawp thu a sawi.

Zoramthanga chuan, MNF-in kum 60 a tlin ṭêp tawh thu sawiin, "A tìr aṭangin Pathianin harsatna namênlo karah pawh min hruai tluan zak a. Mizorama political party dangte hi chu an hming an thlak zung zung a, MNF chu a bul leh tawpah hming dang a la awm lo a, a awm ngai hek lo ang. Pu Denga emaw Pu Zoramthanga emaw, hruaitu dangteah kan innghat lo a, kan thuthlung 'Pathian leh kan ram tan' tihah kan innghat zawk a ni," a ti.

Martarte chu mi ṭhenkhatin politics khelhna atana hmangah an puh ṭhin thu sawiin Zorama chuan, "Martarte ruhro leh an kuangte hi engkim atana hman tlak a ni. Min dem ṭhintute hian an hrethiam lo zawk. Lal Isua pawh khawvel tan a nun a pe a, chu chu a ropuina em em a ni," a ti a; politics-a intuaithar zel nan martarte chu ṭhangtharte'n an la hman zel tur thu a sawi.

Zoramthanga chuan, mi ṭhenkhatin MNF chu India lakah an inpe (surrender) anga an sawi ṭhin thu sawiin, "Inremna kan ziahpuite'n englai mahnin in surrender min ti ngai lo. Kum 1961 aṭang khan MNF chu MNF a la ni ngar ngar a ni," a ti.

MNF President chuan, martarte'n chawimawi an phû thu sawiin, "Vawiina chawimawina ropui ber kan pek chhan hi thil dang vang a ni lo, ram leh hnam tan an neih hlu ber an nunna an pe a, qualification dang zawngin a khûm pha lo," a ti a; martarte'n qualification ropui ber neiin an pass thu a sawi.

Inthlan a hnaih hunah MNF chuan nasa taka sawiselna an tawh leh tur thu sawiin Zoramthanga chuan, "Famkim lohna pawh kan nei ang. 'Pathian leh kan ram tan' tih thupuia kan neihna hi Lalpa'n tling leh fela min ruatna a ni. Dona tam tak karah vawiin thlengin sorkarna siam theiin kan la awm a ni," a ti.

Ex-MNA president Rochung-nunga pawhin thu sawiin, martarte chu an hun lai ang khan lo tho leh ta se, pakhatin pheikhawk pahnih nei se, a ṭhian a pek tur thu a sawi a, "An bun lai ngei pawh a ṭhian a pe phal ang. Martarte hian hnama min siamtu min siam anga Mizote kan din chhuah theih nan an nunna an hlan a ni," a ti a; martar zawng zawngte chu seng khawm vek an duh thu a sawi.

Inkhawmah hian martarte sûnna atan Ex-MNA chuan zahna chibai an bûk a; inkhawm zawhah martarte ruhro chu Luangmuala Martarte Thlanmualah dah a ni.