Administrative Reforms Committee-in hma la ṭan

Mizoram sorkar chuan sorkar department hrang hranga thawktu indaih lohna chinfel a nih theih nan leh a ṭul ang ang khawih turin Administra-tive Reforms Committee a din. Committee hian hma an la ṭan tawh a, ṭum eng emaw zat an ṭhukhawm tawh.

GAD notification-a a lan danin, Administrative Reforms Committee-ah hian chairman chu Lalngheta Sailo, IPS (Rtd.) a ni a, DPAR (GSW)-a joint secretary Lalrinsanga chu secretary a ni. Member atan Mizoram sorkara officer pension tawh pathum - Nghaklianmawia, MCS, Lalthansanga, MFAS leh K Vanlalrawni, MSS-te ruat an ni.

Thu dawn danin, Administrative Reforms Committee tih tur (terms of reference) zingah - Mizoram sorkar depart-ment, public sector undertaking (PSU), board, council, etc.-a sorkar hnathawk zat zir chian te, group C leh D post-te outsource theih dan a awm em tih te, department-te hnathawh dan kalphung leh a kaihhnawiha thawhho / zawm khawm dan a awm em tih te, thawktu indaih zual department aṭangin indaih lo department-a sawn kual chungchangte a tel.

Vanglaini palai zawhna chhangin Administrative Reforms Committee chairman Lalngheta Sailo chuan, hma an la ṭan tawh a, ṭum eng emaw zat an ṭhukhawm tawh tih a sawi a, "Kan khawih tur hi sorkar hnathawk a hniam lam deuhte a ni a, sorkar hnathawkte service leh hamṭhatna lam chu kan khawih turah a tel lo," a ti. An hmalakna hun atan thla ruk chhung hun pek an nih thu a sawi bawk.