Hmun hniha chhiatna thlengah zirlai pali an thi

Nimin chhun khan Phulpui ram chhunga lui, Tuirivânga Rangtla lí-ah Baktawng khaw tleirawl pathum, kum 17 mite chu an tla hlum a; nimin vek khan Keifang naupang kum 10 mi chu motor aṭangin a tla hlum.

Baktawng Dawrveng Branch YMA vice president Lalnuntluanga hnen aṭanga thu dawn danin, Tuirivang luia tla hlumte hi Baktawng Higher Secondary School zirlaite an ni a, Tuirivang luiah intihlim turin an kal a ni. Chhun dar 12 velah pawl 12 zirlai Vanlalhruaii d/o Lalramsanga, pawl 12 zirlai vêk Lalthanzauva s/o Ramfangzauva leh pawl 11 zirlai Lalthanfela s/o Rosangpuia te chu an tla hlum.

Phulpui YMA hruaitute zinga mi Lalparliana Ralte hnen aṭanga thu dawn danin, lí-ah hian Vanlalhruaii a tla a, chu chu tla hlum ve ta pahnihte'n chhan an tum a, mahse, chhan thei loin, an pathumin liah an tla hlum ta a ni.

Mi pathumte hi líah an tla tih hriat a nih veleh Baktawng leh Phulpui khawtlangin an buaipui nghal a, chawhnu lam dar 1:30 velah an ruang hmuh kim a ni. Phulpui khawtlangin kuang an siamsak a, Phulpuia lak phawt an nih hnuah nimin tlai/zan khan Bâktawng panpui an ni.

Nimin vêk khan Keifang naupang Lianmawia (10) s/o Joseph Lalnuntluanga chu motor aṭangin a tla a, a tlakna hmunah a thi. Thu dawn danin, Keifang Middle School-I zirlaite chu thing ṭiak phun tur la turin Ṭamdil-a Forest Plantation-ah motor-in an kal a ni. Ṭamdil Plantation luhna gate chungah sang vak loa thing kham a awm a, chu chu naupang dangte'n an hmuhin an kûn a, Lianmawia erawh chuan hnung lam a hawi avangin a hmu ve lo a, thing kham chu súin, motor aṭangin a tla a ni.