Mumang ramah sorkar an chêng mek - CLP Leader

Congress Legislature Party (CLP) leader Zodintluanga chuan, MNF sorkar chu mumang rama chêng mekah a puh a, kum nga an sorkar tlin mipuiin an ring lo tial tial tih a sawi.

Zodintluanga hian nimin khan Lawngtlai district-a Lungtian khuaah thu sawiin, kum 2018 inthlanah Mizorama sorkarna chelh tura tling MNF chuan thla ruk chhung lekin mipui beisei an phâk lo a, Mizoram an kaihhruai dan avangin kum nga an sorkar tlin mipuiin an ring lo tial tial niin a sawi a, "An sawi lâr ber leh kum 2018 inthlan leh Lok Sabha MP thlan thlenga mipui an bumna SEDP aṭanga chhungkaw tin hnena cheng nuai thum sem an tum thu an sawi chu a thámral mek a ni," a ti.

Assembly House-ah Chief Minister berin SEDP chu 'Project based-a kalpui a ni ang' tiin a sawi tih tarlangin Zodintluanga chuan, "Budget session kan en let chuan, khawi budget-ah mah SEDP a lang lo a June 12, 2019-a budget session neih tur hi i lo thlir phawt ang u," a ti a, sum harsatna avangin sorkar a kal hlei thei lo ṭan tih a sawi.

CLP Leader chuan, sorkar thar chu Mizorama sorkar sawisel hlawh ber a nih phâk tawh thu sawiin, "Tun sorkar thar hi sorkar thar thla ruk chhung leka sawisel tam ber a ni a, thla ruk chhung lekin Chief Minister thusawi leh che zia chu mi zawng zawng tih mai tur hian fiamthu thawh nan an hmang a ni," a ti.

MNF sorkar aia Lai fate zah lo sorkar an awm loh thu sawiin Zodintluanga chuan, "MNF sorkar apiangin LADC sorkar a kal mumal thei lo a, an tibuai a, 'Chung u nung chung bûk tum ang' tih ṭawngkamte a rîk phah a, Lai ṭhalaite an thinrim a ni. Tunah pawh MNF an sorkar leh chiah a, LADC sorkar ṭhiah an tum leh nghal a, mahse, LADC hi ṭhiah a ni dawn lo," a ti a; Congress sorkar hnuaiah chuan district council sorkarte chu ṭha leh zahawm taka an kal thu a sawi.