KHAWTHLIR

ZONET Cable TV chuan nizan khan Aijal Club-ah kumina MPSC Combined Competitive Examination-a tling tharte chawimawina leh hualna inkhawm an buatsaih a, chief secretary Lalnunmawia Chuaungo-in a hmanpui. Chawimawina leh hualna inkhawmah hian Synod executive secretary Rev. K Lalrinmawia'n hunserh a hmang a, Chief Secretary-in fuihna thu a sawi bakah, tling tharte aiawhin pakhatna Dr Laldinsangi'n thu a sawi. Tling tharte hnenah hian thuchei hlan a ni.

Mizoram sorkara School Education department chuan 'Award for Upgradation for the Year 2018-2019 an dawng a, nimin khan Hotel Sonia, Rudrapur, Uttarakhand-a School Games Fede­ration of India Annual General Meeting-ah hlan an ni. Award hi School Education department aiawhin CPEO pahnih H Sanglura leh David Lalthanngura Sailo ten an dawng.

Champhai Town Multipurpose Cooperative Society Ltd. hmalaknaa sak Champhai Veng-thlang North-a Champhai Higher Secondary School building thar chu June 3, Thawhṭanni khan School Education minister Lalchhandama Ralte-in a hawng. Minister chuan, sorkar tharah zirna leh hriselna lamah bung thar kai tura ṭan lak tum a nih thu a sawi. Sikul hawn tâk hi a dung ft. 70 leh a vâng ft. 24, Mizo pa chhiara chhawng thum a ni.

Modern English Higher Secondary School chuan nimin khan kumin HSLC leh HSSLC result an lawm. Khuallian Robert Romawia Royte, minister chuan, social media hman dan chin tâwk neih a ṭul thu sawiin, “Thu dik hriat zawng zawng post-na tur hmun a ni lo,” a ti a, Modern English School hall-ah ceiling fan dah a tum thu leh leh Information & Communication Technology Department kaltlanga computer set 7 a pek tur thu a sawi.