Sorkar tharah kut hnathawktute'n ngaihsak An hlawh leh zual dawn - Agriculture Minister
Kolasib district-a kut hnathawkte chuan June 3, Thawhṭanni khan Kolasib Diakkawn YMA Hall-ah inkhawmpui an hmang a; khuallian, Agriculture minister C Lalrinsanga chuan, sorkar tharah kut hnathawktute'n ngaihsak an hlawh zual dawn thu a sawi.
C Lalrinsanga chuan, sorkar thar thupui ber chu 'Ram leh hnam intodelh' tih a nih thu sawiin, "Mahni thar chhuah ngeiin kan choka a luahlum tur a ni tih hi kut hnathawkte'n chonaah hmang se ka duh. Hnam intodelh ni tur chuan thawhrim leh tei rei peih a ngai. Mizoram chuan kawng hrang hrangin theihna a nei a, Kolasib district phei chuan ‘Rice Bowl of Mizoram’ tih theih tur khawp hiala theihna nei sang a ni," a ti.
Agriculture Minister chuan, huan, lo leh leilet neitu kut hnathawkte'n an theihnate a nihna ang taka pholang turin theihtawp an chhuah ṭheuh a ṭul thu sawiin, "Chumi kawnga puihna ngai zawng zawngah sorkar chu a inhawng reng. Kan leilette hnam dang kutah dah mai loin, a neitute ngei hian hnam thinlung pu chungin i enkawl ang u," a ti a; Mizoram leilung ngeia thar chhuahte chu ram leilung fate'n hlawkpui se a duh thu a sawi.
Kut hnathawkte mamawh inṭâwm phuhrûk nan SEDP hnuaiah hmalak a ni dawn tih sawiin C Lalrinsanga chuan, "Society anga kalte pawh thil intihhmuh chi tak a ni dawn. Kut hnathawkte'n an thil, thlai, sa thar chhuah leh deh chhuahte dahṭhat lailawkna tur storage facility-te pawh tuaihnûm zel a ni ang. Kan ram leilung theihnate hi a hlâwk leh tipung zawnga kutthlak a hun tawh. Hemi kawngah hian sorkar chuan theihtawp a chhuah zel dawn," a ti.
Supply minister K Lalrinliana pawhin thu sawiin, "Mizote'n buh a ni emaw, thil dang pawh ni se, ram mamawh khawp kan thar chhuah theih phawt chuan sorkarin leisak a inhuam reng. Kolasib district hian buhfai leh sanghaahte theihna sang tak a nei a ni," a ti a; ram leh hnam intodelh ni turin thawh hreh nei lo Mizo
ṭhalai an nih a ngaih thu a sawi.
Inkhawmpui hi Kolasib DAO J Rothanga'n a kaihruai a, Kolasib district chhunga khaw 19 aṭangin kut hnathawk mi 350 vel an tel a ni.