Nungcha, thing leh mau humhalh chunga hmasawnna hna thawh CM-in a duh
State Board for Wildlife (SBL), Mizoram chu nimin khan an chairman Zoramthanga, chief minister hoin an ṭhukhawm. Chief Minister chuan, sorkarin hmasawnna hna a thawhna kawng hrang hrangah a theih chen chenah nungcha, thing leh mau humhalh chunga hna thawh a duh thu a sawi.
Meeting-ah hian India leh Bangladesh inrinaa border fencing siam hna thawh mek atan leh fencing-te ti êng reng tur flood light châwmtu tur kawlphetha mamawh 132 KV power grid kalkawngin Dampa Tiger Reserve a tan tlang dawn vanga environment tana harsatna awm theite ngaihtuah a ni.
Ram venhimna thil a nih avangin border fencing chu a pawimawh a, nungchate tana harsatna tlem thei ang ber turin power grid siamnaah department leh NGO-te thawkhoin vil ho ni se, meeting chuan a ti. Phawngpui National Park leh Ngengpui Wildlife Sanctuary enkawl zui zelna kawngah, district council aṭanga zawhna awmte meeting-ah hian ngaihtuah a ni a, 'Sorkar laipui ràwn ni se' tiin thutlukna an siam. Serlui-B Hydel project tuikhuaha dan loa bomb hmanga sangha man an awm ṭhin thu sawi lan a ni a; khauh zawka khuahkhirh hna thawh ni se an ti.
SBL-ah hian Environment, Forests & Climate Change minister TJ Lalnuntluanga chu vice chairman a ni a, member zingah MLA pathum - Prof. F Lalnunmawia, C Lalmuanpuia leh Lalrinsanga Ralte te an tel.