District thar pathumah I-Day-ah Hnam puanzar pawh pharh beisei
Nimin khan Khawzawl damdawi-inah a thlawna inentirna leh thisen pek rûnpui buatsaih a ni a; khuallian, minister R Lalzirliana chuan, district thar pathumah kumin Independence Day lawmnaah MLA-te'n hnam puanzar an pawh pharh hman ngei a beisei thu a sawi.
R Lalzirliana chuan, Khawzawlin district an nei chu a lawmpui thu sawiin, "Hemi tichiang turin nimin lam khan GAD notification tihchhuah a ni. Hun eng emaw chhung atan Civil SDO office chu DC office anga hman a nih ka ring. District tharah kumin aṭangin Independence Day-ah DC thar kaihhruaina hnuaiah MLA-te'n hnam puanzar an pawh pharh hman ngei ka beisei," a ti.
Mi dang tana malsawmna ni tura thisen pek chu Zo nun ze mawi, chhawm nun zel tlak a nih thu sawiin R Lalzirliana chuan, "Sorkar hmalakna vanga pawisa seng loa thisen dawn theih a ni hi a lawmawm hle. Hei hian sorkar hotute'n Mizo mipui an hmangaihzia a tilang a ni," a ti a; mipuite chu free clinic leh blood donation camp hlawhtling leh zawngchhang tlak tak neih a nih theihna turin duhsakna a hlan.
Free clinic-ah hian medicine-ah mi 670, paedetric-ah mi 230, gynaecology-ah 220, dental-ah mi 197, ENT-ah mi 178, surgery-ah mi 43 leh chest medicine-ah mi 21 an inentir a; inentir zawng zawng chu mi 1,718 an ni.