Mexico laka chhiah lak tihsanin Nghawng ṭha lo tak a nei thei : Mexico official

Mexico official-te chuan US President Donald Trump-a'n Mexican bungruaa chhiah lak tihsan a tum chuan dan loa ramchhunga lut a tihzual theih thu leh, ram pahnih tan pawi nasa tak a khawih thei tih an sawi.

Donald Trump hi UK-ah cham mek mah se Mexico leh US official-te hian inbiakna an nei mek a, Trump hian karleh aṭangin Mexico bungruaa chhiah lak ṭhin chu 5% in tihpun a nih tur thu a sawi a ni. 

Trump hian a Twitter-ah Mexico hian duh ni se chuan US-a mipui lut ṭeuh tur leh ruihhlo tawlhruk tur chu an dang thei tih a tweet-a, mahse Mexico Foreign Minister Marcelo Ebrard chuan hemi chung­changah hian hma la lo nise chuan kumin chhung hian mi nuai chuang fein US an lut tawh ang, a ti ve thung.

Mexico Economy Secretary Graciela Marquez nena chhiah lak tihsan chungchanga inbiakna nei mek US Commerce Secretary Wilbur Ross chuan dan loa US-a luh tumte chungchangah hian tun aia nasa zawkin Mexico chuan hma an lak a ngai tih a sawi ve bawk.