Chief Secretary-in officer tharte a fuih Party-a tel loa sorkar thawhpui turin a chah

ZONET Cable TV chuan June 4, Thawhlehni zan khan Aijal Club-ah Mizoram Civil Services (Combined Competitive) Examination-a tling tharte chawimawina leh hualna an buatsaih a, chief secretary Lalnunmawia Chuaungo chuan, political party-a tel lo tur leh ṭan lam nei lo tura officer tharte a fuih rualin, sorkar lai apiang thawhpui thiam turin a chah.

Mizoram Civil Service (MCS) leh Mizoram Finance and Account Service (MF&AS)-a tling tharte chawimawina leh hualna inkhawmah hian Synod executive secretary Rev. K Lalrinmawia'n hunserh a hmang a, Chief Secretary-in fuihna thu a sawi. ZONET Cable TV Board-a director K Sapdanga'n inlawmna thu a sawi a, tling tharte aiawhin pakhatna Dr Laldinsangi'n thu a sawi. bawk.

ZONET Cable TV hian kum 2008 aṭangin MCS, MPS leh MPSC Combined Competitive Examination-a tlingte pualin chawimawina leh hualna hun an hmang ṭhin a; kuminah hian MCS leh MF&AS tling tharte hnenah chawimawina thuchei leh 'Tûkchhuah nuam u le' tih lehkhabu an hlan a ni.

Chief Secretary chuan, sorkar hnathawkte chu sorkarn hlawh neia a rawih, ram leh hnam leh mipuite tana rawngbawl an nih thu sawiin, "Public servant tia kohte kan ni a, hei hi kan theihnghilh loh a pawimawh. Sorkarin min rawih chhan hi public service a ni," a ti.

Sorkar hnathawk tan political party zawm a thiang lo tih sawiin Lalnunmawia chuan, "Party worker ang hrima kan hnathawhnaah kan chet chuan conduct rules kan bawhchhia a ni a; hremna kan tâwk nghal kher lo thei, mahse, morally leh ethically-in a dik lo," a ti a, sorkar hnathawk zingah party ṭan bik nei an lo awm tawh ṭhin a, chu'ng mite chu miin hnung lamah an nuihzat ṭhin tih a sawi.

India ram chu democracy a ni avangin mipui thlan roreltute an awm tih sawiin Lalnunmawia chuan, "Chief minister, MP leh MLA-te an awm a, thuneihna leh thutawp neitu an ni. Chumi hre reng chuan, eng pawh sorkar se, tuna sorkarna chelh apiangte kan thawhpui thiam a ngai a ni," a ti.

Chief Secretary chuan, officer tharte chu tih tur an hmaa awmte ngaihtuah chiang tura chahin, "A ethical em, tih ngaihtuah ula, a ethical lo a nih chuan pumpelh tur. Dan kalh a ni em, tih ngaihtuah ula, dan kalh a nih chuan tih loh tawp tur a ni," a ti a, an ngaihdante an sawi ve tur a nih rualin, thutawp siamtu chu political executive an ni tih hre tur te, an ngaihdante chiang taka an tihlan hnua an ngaihdan ang ni loa thutlukna a awm pawhin, thutlukna chu an pawma an bawhzui tur a ni tih hre turin a chah.

Political executive-te nen ngaihdan inang lo leh dan kalha thil tih tumna a awm mai thei tih sawiin Lalnunmawia chuan, "Chumi kan dodal avang chuan transfer kan tawk mai thei. Transfer kan nih pawhin, hremna a ni lo, i career tichhe thei a ni lo. Political executive zingah fel tak tak, thil dik lo tihtir tum duh miah lo tur tam tak an awm, chutih rualin, thil dik chiah lo tihtir tum pawh an awm zauh thei. Thil dik lo ti duh lo in ni tih an hriat chuan, a rûk takin an zah ang che u. Thil dik lo tihtir theih kan ni tur a ni lo," a ti.