Green Rally huaihawt

Mizoram Pollution Control Board (MPCB) chuan World Environment Day pualin nimin zing dar 6 khan Green Rally an huaihawt a, MPCB hnuaia Eco Club member-te telin, MPCB chairman Dr CH Muralidhar Rao leh member secretary C Lalduhawma ten an telpui.

Green Rally-ah hian Aizawla sikul leh college pakua aṭangin zirlaite telin, Sikulpuikawn leh Chanmari kâwn aṭangin Eco Club member zirlaite chu an tlân ṭan a, Vanapa Hall kawtah an intâwk khawm. Vanapa Hall kawtah inkhawm tawi buatsaih a ni a, MPCB Chairman leh Member Secretary ten fuihna thu an sawi a, environment humhimna kawngah thu an tiam thar bawk.

MPCB chairman Dr CH Muralidhar Rao chuan, kum 30 kal taa Mizorama a awm tirh lai chuan inchhêmna fan an mamawh ngai loh thu sawiin, tunah erawh chuan fan mai ni lo, air conditioner thlenga hman a ṭul tawh thu a sawi a, "Boruak lum zel leh bawlhhlawh zel hi vên a ṭul tawh tak zet a ni," a ti.

C Lalduhawma chuan, boruaka bawlhhlawh léng vel leh ri bengchhengte vên nan in leh a vêlah hnim ṭotir hram hram a ṭhat thu leh kopang lung remahte pawh hnim zàmtir theih a ṭhat thu a sawi.