Rakzu ṭhat loh vangin fimkhur turin chah

Excise & Narcotics department (END) chuan thuchhuah siamin, Phunchawng leh Rangvamual vela rakzu siamte chu a chhiat thu leh a hlauhawm thu an tarlang a, fimkhur tur leh in lo turin mipui an chah a, The Mizoram Liquor (Prohibition) Act 2019 (MLP Act) hnuaiah zu leh a kaihhnawih dap kawngah theihtawpa hma an lâk thu an tarlang.

END chuan, "Tunlaia Phunchawng leh a chhehvela zu siam, Rangvamual leh hmun dang danga an thehdarhte hi tun hmaa Mizo rakzu siam dan pangngai ang ni loin, chhangthâwp urna dawidim (instant yeast) hmangin an siam ṭhin a ni. Damdawi lam thiamte chuan instant yeast-a zu siam in hi a hlauhawm em em a, kal (kidney) leh thin (liver) a khawih chhe hma hle tih an sawi. Chuvangin, Aizawl leh a chhehvela rakzute hi in a hlauhawm hle a, fimkhur turin mipui kan ngen a ni," an ti.

END enforcement-te chuan June 4, Thawhlehni khan Phunchawng leh Rangvamual rama dan loa zu siamna dap beihpui an thlak a; rakzu litre 300, zu bilh lai ṭín 3,460, zu siamna bél 72 leh dawidim (instant yeast) kg. 2 an man a, zu siamna (factory) 35 an tichhe bawk.

Excise & Narcotics department hian tun kar chhungin rakzu litre 180, zu bilh lai ṭín 202, dawidim kg. 2.5, sap zu (ûm puitling) ûm 210 leh a chanve ûm 96, beer ûm 18, sap zu (ram danga siam) ûm 16, BEDC litre 16.8, heroin gram 14.13 leh ganja kg. 1.5 an man tawh a; zu leh ruihhlo kaihhnawihah mi 27 an man tawh bawk a ni.