August 1 aṭanga plastic khapna atana Dan hman tur AMC-in an siam tawh

Aizawl Municipal Corporation (AMC) hotute chuan nimin khan Aizawl Press Club-ah thuthar thehdarhtute an kâwm a; August 1, 2019 aṭanga Aizawla plastic bag (polythene) microns 50 aia pan khap tur chungchang an sawifiah a, "Plastic khapna dan (bye law) siam a ni tawh," an ti.

AMC mayor PC Lalhmingthanga chuan, kum 2016-17 khan Aizawlah plastic bag leh thermoplastic dinhmun zir chian a nih thu sawiin, "Kum 2017 aṭangin Krismas leh kumthar rua ṭhehna atan thermoplastic hmang lo turin ngenna AMC-in kan ti chhuak a, hei hi kohhrante'n an zâwm ṭha hle. Ruaiṭhehnaa hman turin kohhran tam takin steel plate tam tak an lei belh phah a, kan lawm hle a ni," a ti.

September 20-21, 2018 chhung khan Non Plastic Exhibition an buatsaih thu sawiin PC Lalhmingthanga chuan, "Mipuiin min hlutsak a, sikul naupang tam takin exhibition an rawn tlawh. Exhibition hi plastic khap a nih huna thlakna tur zawnna atan leh mipui rilrua plastic ṭhat lohna inzirtirna atan hman a ni," a ti a, exhibition-ah plastic thlakna tur thil chi hrang hrang pho chhuah a nih thu a sawi.

AMC Mayor sawi danin, AMC Board of Councillor meeting chuan August 1, 2019 aṭangin plastic micron 50 aia pan zawng zawng khap a rêl a, chumi bawhzui tur chuan Committee on Plastic Free City din a ni. Plastic bawlhhlawh sawngbawl kawnga hma la turin JB Enviro Consultant Private Ltd. leh AMC ten thuthlung an ziak tawh.

AMC BoC-in plastic khapna atan dan an siam tawh a, Mizoram sorkar pawmpuina nghah mek a ni. Dan hi AMC pisaah leh website www.amcmizoram.com ah en theih a ni. Dan hmang hian plastic bag, micron 50 aia pan zuar leh hmangte chu hrem (pawisa chawitir) an ni dawn.

PC Lalhmingthanga chuan, plastic bag chu vawi khat hman hnua paih leh mai ṭhin, thil ṭawih ral mai thei lo a nih thu sawiin, "A thlen chin ram leilung a tichhia a, lui tui tibawlhhlawh nasa tu zinga mi a ni. Kum tin plastic metric ton nuai 80 aia tam tuifinriatah a luta sawi a ni," a ti.

AMC Mayor chuan, Aizawl khawpui pumpui huapin June 7, Zirtawpniah plastic thenfai hnatlangpui buatsaih tum a nih thu sawiin, "Sorkar department zawng zawng leh zirna-inah hnatlan a ni dawn a, veng tinah local council-in hnatlangpui an ko ang," a ti a; sorkar department-te an hnatlan theihna atana ngenna an siam phalsak an nih avangin an lawm thu a sawi.

Aizawl khawpuia bawlhhlawh paih kalpui dan sawiin Mayor chuan, "October 2012 aṭang khan public private partnership (PPP) mode hmangin bawlhhlawh paih ṭan a ni a, a senso AMC-in 80% leh mipuiin 20% an tum. SIPMIU aṭanga motor kan dawn hnuah Aizawl khawpui hi zone pakuaa ṭhenin contractor pakaw hnenah motor hi sem darh a, bawlhhlawh paih a ni," a ti.

AMC Mayor chuan, contractor hmanga kum khat leh thla li paih a nih hnuah April 2019 aṭangin PPP mode hmanga bawlhhlawh paih leh ṭan a nih thu sawiin, "Tunah hian Aizawl khawpuiah chhungkaw 67,594 vel an awma hriat a ni a, kan bawlhhlawh paih hi ni khatah metric ton 159.9 vel a ni," a ti a, AMC-in bawlhhlawh paihna atan thla khatah cheng nuai 45 vel an sên thu a sawi.

SIPMIU-in Tuirial lui chhakah bawlhhlawh paihna tur, New Sanitary Landfill and Resource Centre an buatsaih mek thu sawiin PC Lalhmingthanga chuan, "Hei hi bawlhhlawh ṭawih thei hmanga leiṭha siamna tur leh ṭawih thei lo sawngbawlna hmun tur a ni. Hman theih a nih hunah chuan veng tina kan bawlhhlawh paih hi a paihtu mipuite'n thliar nghalin, paih hunbi fel tak siama paih ṭhin a ni tawh ang," a ti.

AMC Mayor chuan, Solid Management Rules, 2016-in a phût angin, bawlhhlawh thliar hrang a, paih dan tur pawh ruahmanna fel tak neih tur a nih thu sawiin, "Hemi bawhzui hian August 2018 aṭang khan local council pakuaah bawlhhlawh thliar hrang tura hmalak a ni," a ti a; bawlhhlawh sawngbawlna hmun peih a nih hunah chuan local council zawng zawngah bawlhhlawh thliar hran a nih tur thu a sawi.