KHAWTHLIR

Bungkawn Vengthar Branch KṬP chuan an din champha pualin nimin khan blood donation camp an huaihawt a, Synod Hospital tan mipa 27 leh hmeichhia pangate'n thisen unit 32 an pe. ṬKP Hnahthial North Pastor Bial chuan nimin vêk khan BCM Hnahthial Electric Centenary Hall-ah Christian Hospital tan thisen unit 56 an pe a, petute mipa 45 leh hmeichhia 11 an ni. Congregational Church of India (Maraland) KTP Pastor Bial-II member mipa 19 leh hmeichhia parukte pawhin Saiha District Hospital tan thisen unit 25 an pe bawk.

Mizoram Agriculture Marketing Solution (MAMSol)-in Bairabi Mini Trade Centre-a cheng nuai 150 sênga Cold Storage Facili­ty an din chu June 4, Thawhlehni khan Agriculture minister C Lalrinsanga'n a hawng. Minister chuan, cold storage-a thlai leh thei dah tur thar chhuah a tam tâwk loh a hlauh­awm thu sawiin, "Kut hnathawkte taima leh zuala thawk tura chona petu ni se ka duh," a ti.

Republic Vengthlang Local Council chuan nimin zing khan an veng mi, kumina HSLC pass tharte lawmpuina hun an hmang a, bialtu MLA C Lalsawivunga'n a hmanpui. MLA hian HSLC pass thar mi 32 hnenah lawmpuina thilpek a hlan a, MLA-in fuihna thu a sawi.

Clean and Green Revolution chuan World Environment Day pualin nimin khan Lengpui kawngah Forest department nen ṭanghoin thing phun hnatlang an nei a, mi 60 chuang thawk chhuakin, thing ṭiak 50 chuang an phun.

Sorkar laipui chuan, mi dangte nunna chhantu mi huaisente hnena lawmman hrang hrang - Jeevan Raksha Padak (series) award-te a pe leh dawn a, award hi mi dangte nunna chhan chhuaktute hnenah hlan ṭhin a ni. Dil duh emaw, rawt duh emaw neite chuan mahni awmna DC, SDC leh BDO pisaahte zawhfiah theih a ni a, August 31, 2019 aia tlai loah dilna thehluh tur a ni.