Aizawl By-Pass Road kam thianfai

ITI Vengchhak Kohhran Pavalai Pawl (KPP)-te chuan nimin khan Aizawl By-Pass Road-a Chite lei aṭanga ITI Veng huam chhunga kawngpui kamte tifaiin an hnatlang a, mi 30 vel an thawk chhuak.

ITI Vengchhak KPP-te chuan, Aizawl By-Pass Road chu ruihhlo tite chet tamna hmun leh thil sual tihna atana hmun remchang tamna a nih avangin zu bâwm, ûm ruak leh zu fûnna (polythene) a tam ṭhin hle a, chu chu Mizo hnam anga thil mualphothlak nia an hriat avangin thenfai hnatlang an nei ta tih an sawi. 

Aizawl By-Pass Road kawngpui kamah bawlhhlawh, leivûng leh êk paih ṭhin an awm thu sawiin, mipui tana ṭawp leh hnawk a nih avangin, paih tawh lo turin mi tin an ngen a ni.