Zirlai ti ṭha lawmpuina Minister-in hmanpui

Minister of state TJ Lalnun­tluanga chuan nimin khan MZP Headquarters, Saitualin an khuaa zirlai ti ṭhate lawmpuina Saitual College-a an buatsaih a hmanpui. 

TJ Lalnuntluanga chuan, zirlaite chu Mizo hnam thinlung pûa ram leh hnam hmangaih tura chahin, "Lehkha thiamin, zir thei viau mah ula, kan hnam hi chîmrala kan awm si chuan awmzia a awm lo. Eng mi pawh ni ila, hnam nihna nun chhuahpui a, hnam ziaráng theihnghilh lo turin zirlaite leh nu leh pate ka sawm che u a ni," a ti.

Zirlai ti ṭhate chuan an zir zelnaah ti ṭha chhunzawm zel se a duh thu sawiin Minister chuan, "Thiam thei lo zawk leh tuna chawimawi loh zawkte hi a tlo zawk leh hlawhtling zawk an ni leh fo a, thiam thei zawkte hi a beidawng hma leh tláwm hmasa zawk an ni leh ṭhin. Chuvangin, zirlai chawimawite hi taimakna leh tumruhna nen hmabak hlen zel turin ka chah che u a ni," a ti a; Pathian ṭihna nena hmabak hlen zel turin a fuih a ni.