Khua leh tui chhinchhiahna tur Governor-in a la pawmpui lo

March 18, 2019 a Assembly Session-a pass khua leh tui dik takte chhinchhiahna tur, 'The Mizoram Maintenance of Household Registers Bill, 2019' chu nimin thleng khan governor Jagdish Mukhi chuan a la pawm lo.

Vanglaini zawhna chhangin bill neitu department General Administration Depart-ment (GAD) hotute chuan, Governor Secretary hnen aṭanga thu an dawn danin he dan chungchangah hian Governor chuan dan lama mithiamte a rawn mek a ni. Governor-in a la pawmpui loh avang hian he dan duan thar hi hman theih a la ni lo.

Hetihlai hian governor Jagdish Mukhi chuan The Mizoram Maintenance of Household Registers Bill, 2019 bill a pawm loh chungchangah hian sawi tur a neih loh thu a Raj Bhavan-a hnathawkte kaltlangin Vanglaini a hrilh. March, 2019-a Assembly Session neih ṭuma bill pass dangte chu Larsap hian a pawmpuina 'assent' a pe tawh.

Bill put luh a nih ṭum hian GAD changtu chief minister Zoramthanga chuan, ṭhenawm ram aṭanga Mizorama dan loa lo lutte chu kum tam tak Mizote tan buaina thlentu an nih tawh avangin ramria chengte chhinchhiah chu dan loa Mizorama lo lutte zawn chhuahna kawng awlsam tak a nih dawn avangin he dan thar hi duan a ni tih a sawi.

Zoramthanga chuan he dan hi ṭha taka kalpui a nih chuan dan loa lo lutten Mizoram khua leh tui dik takte chanvo an chhuhsak ṭhin pawh veng thei tura ngaih a nih thu sawiin, "Hemi piah lamah hian vemhimna pawh awlsam leh khauh zawka kalpui a nih theih beisei a ni," a ti.

Chief Minister sawi danin, National Register of Indian Citizens leh Multipurpose National Identity Cards hmanga ram mipuite chhinchhiah an nih angin he dan thar hmang hian Mizoram khua leh tui dik takte chhinchhiah an ni dawn a, he mi atan hian sum hman belh ngai zat tur chhutchhuah la ni chiah lo mah se, sum tam tak sen ngai lo tura beisei a ni.