KHAWTHLIR

Planning secretary Dr C Vanlalramsanga chuan, nimin khan Lunglei Government College leh Higher and Technical Institute of Mizoram (HATIM) a tlawh a, college-a Entrepreneurship Knowledge Cell (EK Cell)-te hnathawh leh hmalaknate an enfiah. EK Cell hi Planning department hnuaia Mizoram State Entrepreneurship Development Monitoring Committee (MEDMOC) kaltlanga buatsaih a ni a, a tum ber chu zirlai leh ṭhalai tam zawk ten mahni kutkawiha eizawnna (entrepreneurship) chungchang an hmelhriat a ni.

Serchhip District Level Co-ordination Committee on 7th Economic Census chu an chairman, DC Sangchhin Chinzah hoin an ṭhukhawm a, 7th Economic Census tun thla aṭanga ṭana thla thum chhung neih tur chungchang an sawi. Meeting-a tarlan a nih danin, kumin hian Economic Census hi Common Service Centre kaltlanga neih tur a ni a, in zawng zawng geo-tag vek a ni ang.

Mizoram sorkarin kum 2008-a district headquarters-a puan tawh khaw pathumte district headquarters anga an kal theihna tura hmalakna kal zelah, Accounts & Treasuries department-a joint director (Lunglei) Zokunga chuan June 5, Nilaini khan Hnahthial a tlawh a, Hnahthiala Treasury office leh quarters turte a enfiah. Zokunga hi Hnahthial BDO H Lalramliana, Hnahthial North-I V/C member-te leh Hnahthial Town V/C Association hruaitute'n an ṭawiawm a ni.

Khawbung Higher Secondary School chuan, Nilaini khan an khaw community hall-ah an kum 10 tlin leh HSSLC result an lawm a, School Education minister Lalchhandama Ralte-in a hmanpui. Minister chuan, ram hmasawnna tluantling nei turin zirna a pawimawh thu sawiin, "Sumdawnna leh eizawnna kawng hrang hrangah hnam thinlung pu chunga lehkha zir a pawimawh," a ti. Khawbung HSS aṭang hian kum 10 chhungin zirlai 248-in HSSLC an hmachhawn a, chu'ng zinga 226 chu an pass a ni.