Harsatna lian tham an la tâwk lo - Agriculture Minister

Agriculture department chuan Covid-19 vanga lockdown leh curfew puan chhungin loneitute'n harsatna an neihte an thlenna tur Farmers Helpline an siam. Agriculture minister C Lalrinsanga chuan, loneitute'n harsatna lian tham an la tawh loh thu a sawi.

Vanglaini palai zawhna chhangin Agriculture Minister chuan, tun dinhmunah loneitute'n harsatna lian tham an la tawh loh thu a sawi a, "Loneitute'n harsatna an tawh a, an harsatna an thlenna tur kan lo ruahman lâwk mai a ni. Harsatna an tâwk a nih phawt chuan sorkarin theihtawp chhuahin a pui dawn," a ti.

Farmers Helpline hi nimin khan hawn a ni a, vawiin aṭang in loneitu harsatna tâwkte tan telephone number 0389-2311160 leh 0389-2328564-ahte chawhma dar 10 aṭanga chawhnu dar 2 thleng biak theih a ni dawn a, Pathianni leh Good Friday-ah erawh chuan biak theih a ni lo ang. Farmers Helpline hawng tu Agriculture director Rohmingthanga Colney chuan, loneitute'n thlai chi, thlai damdawi leh leiṭha an khaihlak lohna atan ruahmanna siam a nih thu a sawi a, "Ruahmanna kan siam hi thuneitute hnenah thlen mek a ni," a ti.