Excise department-in zu siamna tichhia

Excise & Narcotics department (END) chuan nimin khan Phunchawng leh a chhehvela dan loa zu siam dap hna an thawk a; zu sakna hmun eng emaw zat leh zu bilh mek tam tham tak an tichhia.

END chuan, Covid-19 vanga ram pum inkhârkhip a nih avang leh dan kengkawhtute leh local task force-te ṭhahnemngaihna azarah Phunchawng leh Rangvamual lamah dan loa zu in tura kal leh zu hralh a tlahniam hle tih an tarlang a, "Chutih laiin, Phunchawng leh a chhehvelah zu siam ru an awma hriat a nih vangin Zirtawpni khan a dapchhuah hna thawh a ni," an ti. END chuan zu leh ruihhlo laka inthiar fi hlîm turin mi tin an ngen a ni.