Free blood atan sorkarin sum a la pe lo Blood bank ṭhenkhatin bag an nei tlem

Mizoram sorkar chuan kumin 2019 January thla aṭangin thisen sawngbawlna senso (blood processing fee) lak ṭhin chu sorkar damdawi-in bikah a tihtawp thu a puang. He mi atana sum mamawhte sorkarin tun thlengin MSACS leh blood bank-ah a la pe lo tih thu dawn a ni. Hetih lai hian, district hospital hrang hranga blood bank-te chuan blood bag leina tur leh thisen lakna bungraw dangte an nei tam lo hle.

Council of Ministers meeting, January 10, 2019-a neih chuan blood processing fee lak mek tihtawp a rêl a, chu chu hman nghal turin a ti. Hemi chungchangah hian Health minister Dr R Lalthangliana chuan press mite zawhna chhangin, blood processing fee atan kum khatah cheng nuai 200-300 vel sen a ngaih thu te, sum mamawhte chu budget-ah dah a nih tur thu te, budget session hmasa ber (March thlaa neih)-ah khung a nih tur thute a lo sawi tawh a ni.

Health Minister chuan, kum 2019-20 budget thar hman ṭan hma thla hnih/thum vel chhunga blood processing fee atan cheng nuai 50 vel a ngaih tur thu leh, chu'ng atan chuan sum awm sa pawh khawma kalpui a nih tur thu a sawi.

March 20, 2019-a Assembly budget session-a INC member Zodintluanga zawhna a chhannaah Health Minister chuan, kum 2019-20 chhunga blood processing fee atan Finance-ah cheng nuai 200 dil a nih thu a sawi.

Hetih lai hian, kum 2019-20 chhunga Mizoram sorkar budget ruahman - Demand for Grants (for vote on account) 2019-2020-ah chuan, 'Blood Transfution' tih a awm a, chutah chuan cheng nuai 150 chiah dah a ni. MSACS-a thawkte chuan, kumin January thla tir lam aṭanga blood processing fee tihtawp a nih hnuah, Mizoram sorkar aṭangin blood bag leh hmanraw dangte leina tur sum, tun thlengin an la dawn loh thu leh, Mizoram sorkarin processing fee a pek tur chu MSACS-ah a pe dawn nge, blood bank (hospital)-ah an pe dawn zawk tih tun thlenga an hriat loh thu an sawi.

MSACS lam chuan, "State sorkarin blood processing fee atan sum a pe dawn a nih pawhin, kei ni chu a pawisain min pe lo ang, budget-ah sum an dah a nih pawhin, sorkarin a lei ang a, blood bank hnenah an pek mai a rinawm," an ti. Thu dawn danin, MSACS hian hun rei tak chhung chu Mizorama blood bank hrang hrangte hi blood bag leh hmanraw dangte an lo tumsak tawh ṭhin a; tunah erawh chuan hun eng emaw ti aṭang khan an tumsak thei tawh rih lo. Tun dihmunah, MSACS-in thisen lakna atana bungraw pawimawhte leina tur sum an nei lo a, National AIDS Control Organisation (NACO) aṭangin a bungruaa dawn an inbeisei mek.

Mizorama model blood bank awm chhun Aizawl Civil Hospital Blood Bank chuan hun eng emaw ti kal ta aṭangin MSACS aṭangin blood bag leh hmanraw dang emaw, a leina tur sum emaw an dawng tawh lo a; anmahni sum báwm RKS aṭang leh blood processing fee an lâk laia sum an hmuh tawhte hmangin an la lei thei rih a ni.

District hospital hrang hranga blood bank-te'n MSACS aṭanga blood bag leh hmanraw dang an dawn lohna erawh a la rei lutuk lo a; anmahni'n an remchan angin an lo inngaihtuah rih tih an sawi. Thu dawn danin, tun hnaiah district hospital hrang hranga blood bank-te'n thisen lakna bungrua an nei tam lo vek a, chuvang chuan blood donation camp nei duhte pawh an neihpui theih loh châng a awm zauh zauh a ni.

Blood bank ṭhenkhata thawkte chuan, blood bag leh bungraw dangte chu sorkarin a leisak dawn hnai nia an hriat thu an sawi. Hemi chungchang hi Hospital & Medical Education (HME) department hotute zawhfiah a ni a, supply order tihchhuah a nih tawh thu an sawi. Press mite hmaa thil sawi theia an inngaih loh avangin, blood processing fee chungchanga sorkar hmalak tawh chin hriat mai theih a ni lo.

Tarlan tawh ṭhin angin, Mizoram sorkar hnuaia State Blood Transfusion Council (SBTC) chuan kum 2014-ah thisen hmangtute aṭangin thisen unit khatah Rs. 550 zel lak an rêl a; January 2015 aṭangin fee lak ṭan a ni.